„საქართველოში დაახლოებით 200 ათასი ადამიანი არალეგალურად არის დასაქმებული,“ – ამის შესახებ დამსაქმებელთა ასოციაციის იურიდიული კომიტეტის თავმჯდომარემ ვახტანგ შურღაიამ რადიო „პალიტრასა“ და „პალიტრანიუსის“ გადაცემაში „საქმე“ განაცხადა.
შეგახსენებთ, რომ „შრომითი მიგრაციის შესახებ“ კანონი პარლამენტმა ივნისის ბოლოს დაამტკიცა. ცვლილებების თანახმად, უცხოელებს საქართველოში დასაქმებისთვის სპეციალური ნებართვა დასჭირდებათ. ამასთან, „უცხოელ სამუშაო ძალას მიეცემა დასაქმების უფლება მხოლოდ იმ პირობებში, როდესაც დადასტურდება, რომ შესაბამისი პოზიციებისთვის ადგილობრივი კადრები არ არის ხელმისაწვდომი“.
აღსანიშნავია, რომ „შრომითი მიგრაციის“ კანონის გამკაცრებასთან ერთად, წესდება ახალი ჯარიმებიც კანონის მოთხოვნის დარღვევებზე. უფრო კონკრეტულად, უცხოელის შესაბამისი უფლების გარეშე დასაქმების შემთხვევაში, დამსაქმებელიც და თავად დასაქმებული უცხოელიც 2000 ლარით დაჯარიმდებიან.
„არაერთი წელია, რაც დამსაქმებლების მხრიდან გამოითქმის პრეტენზია, რომ ყველა სფეროში მუშახელის კვალიფიკაციის პრობლემაა, შესაბამისად, სადაც არის მოთხოვნა, ჩნდება მიწოდებაც. დღეის მდგომარეობით, სისტემაში 42 ათასი ადამიანია აღრიცხული, ანუ ამ რაოდენობის უცხოელი ლეგალურად არის დასაქმებული საქართველოში, თუმცა ამავე კანონპროექტის განმარტებით ბარათში აღნიშნული იყო, რომ ორი წლის განმავლობაში 200 ათასზე მეტი ადამიანი დარჩა საქართველოში, ეს ადამიანები სავარაუდოდ, დასაქმებულები არიან, თუმცა არალეგალურად.
რაც შეეხება უცხოელის დასაქმების პროცედურად, აქამდე დამსაქმებლის მიერ ხდებოდა უცხოელის რეგისტრაცია ელექტრონულ სისტემაში, რომელიც ჯანდაცვის სამინისტროს გააჩნდა. მხოლოდ რეგისტრაცია იყო საჭირო, რომ უცხოელი ლეგალურად ყოფილიყო დასაქმებული, არანაირი სხვა დამატებითი მოთხოვნები ამ ეტაპზე არ ყოფილა.
ახალი საკანონმდებლო ცვლილებით, იმისათვის, რომ უცხოელი ლეგალურად დასაქმდეს საქართველოში, პირველ რიგში საჭიროა, ჯანდაცვის სამინისტროდან სპეციალური თანხმობა იყოს მოპოვებული. ამისთვის სამინისტროს დამსაქმებელმა ან თვითონ უცხო ქვეყნის მოქალაქემ უნდა მიმართოს. აღნიშნული უფლების მოპოვება შესაძლებელია, როგორც საქართველოს ფარგლებს გარეთ ყოფნის პერიოდში, ასევე იმ შემთხვევაში თუ უცხოელი საქართველოში ლეგალურად იმყოფება. თანხმობის მოპოვების შემდეგ, თუ უცხოელი საზღვარგარეთ არის, მას აქვს 30 დღე, რათა მიმართოს შესაბამის საკონსულო განყოფილებას და მიიღოს D1 კატეგორიის ვიზა და საქართველოში ამის შემდეგ ჩამოვიდეს. თუ უცხოელი საქართველოში იმყოფება, მას ეძლევა 30 დღე, რომ შესაბამისი ბინადრობა მოიპოვოს. მხოლოდ ამის მერე ექნება მას დასაქმების საშუალება,“ – განაცხადა ვახტანგ შურღაიამ.
მისი თქმით, კანონის მნიშვნელოვანი ნაწილია, რომ ცვლილების მიხედვით, უცხოელი, რომელიც მოიპოვებს დასაქმების ნებართვას მხოლოდ იმ კონკრეტულ დამსაქმებელთან მუშაობის უფლებას მიიღებს, ვისაც მიუთითებს განცხადების წარდგენის დროს, ხოლო იმ შემთხვევაში თუ ის სამსახურის შეცვლას გადაწყვეტს, პროცედურების გავლა თავიდან მოუწევს, ამჯერად ახალ დამსაქმებელთან ერთად.
„კანონში ასევე გარკვევით წერია, რომ მხოლოდ იმ უცხოელის დასაქმება არის შესაძლებელი, რომელიც მაღალკვალიფიციურია და მიდის იმ სფეროში სამუშაოდ, სადაც კადრების დეფიციტია. კანონი 2026 წლის მარტიდან ამოქმედდება და მასში წერია, რომ პირს, რომელიც უკვე არის რეგისტრირებული ელექტრონულ ბაზაში, სწორედ მომავალი წლის მარტამდე ექნება ვადა, რათა მოვიდეს შესაბამისობაში ამ კანონის მოთხოვნებთან,“ – აღნიშნავს ის.
ვახტანგ შურღაიამ დამსაქმებლებს კანონის ამოქმედებამდე გარკვეული პროცედურების გავლა ურჩია.
„ვისაც არ ჰყავს დარეგისტრირებული ელექტრონულ რეესტრში დასაქმებული, ისინი უკვე ვერაფერს იზამენ, მაგრამ ვისაც ჰყავს, მათ ვურჩევ, პირველ რიგში დაელოდონ კანონქვემდებარე ნორმატიულ აქტს, სადაც დეტალურად გაიწერება პროცედურა, რა უნდა გააკეთონ. კვალიფიკაციასთან დაკავშირებული დოკუმენტაციის მოძიება კი დღეიდან შეუძლიათ სთხოვონ მათთან დასაქმებულ უცხოელებს, იქნება ეს დიპლომი, სერთიფიკატი და ა.შ. რომლის გამოგზავნას და დამოწმებასაც დრო სჭირდება,“ – განაცხადა მან.
www.bpn.ge
Loading ...