საქართველოს პრეზიდენტმა, სალომე ზურაბიშვილმა მონაწილეობა მიიღო ბრიუსელში გამართულ დისკუსიაში “ქალები კონფლიქტებში”. დისკუსიის მონაწილე იყო ასევე უკრაინის პირველი ლედი, ოლენა ზელენსკა და ევროპული საბჭოს პრეზიდენტის, შარლ მიშელი. პრეზიდენტმა ოლენა ზელენსკას სოლიდარობა გამოუცხადა ყველა ქართველი ქალის სახელით და თქვა, რომ ომის პირველი მსხვერპლები ყოველთვის ქალები არიან, თუმცა დღეს უკრაინის ომში მთელი უკრაინელი ერი მონაწილეობს და ეს არ არის ომი, რომელსაც მხოლოდ კაცები ხელმძღვანელობენ.
„ალბათ არ არსებობს სიტყვები, რომლებიც აღწერს სურათებს, რასაც ვხედავთ უკრაინაში უკვე 106 დღის განმავლობაში მიმდინარე ომის დროს. ვერც ერთი სიტყვა ვერ აღწერს იმ ძალადობრივ ომს, რომელსაც რუსეთი აწარმოებს უკრაინაში იმ სახელმწიფოს წინააღმდეგ, რომელსაც მოძმე სახელმწიფოდ აცხადებდა. პარადოქსი სახეზეა. არავინ არ გაუკეთებს ასეთ რამეს ახლობელ სახელმწიფოს და ხალხს. რუსეთი ამ ხალხს კლავს ყოველდღე, მათ შორის ქალებსა და ბავშვებს.
ჩვენ ვიცით, რომ კონფლიქტებში პირველი მსხვერპლი ქალები არიან. ჩვენ გვქონდა ეს გამოცდილება რუსეთის მხრიდან საქართველოში განხორციელებული სამი აგრესიის პერიოდში. ქალები იყვნენ ომის მსხვერპლები, ქალები იყვნენ იძულებით გადაადგილებულები, მაგრამ რასაც ახლა უკრაინაში ვხედავთ არის ის, რომ ქალებმა საკუთარი როლი შეასრულეს, ისინი არიან მაქსიმალურად მდგრადები და სრულად ჩართული პროცესში, რომელიც ერთ-ერთი ყველაზე ექსტრაორდინალური გამოხატულებაა საზოგადოების ერთიანობისა. ეს არ არის ომი, რომელსაც კაცები ხელმძღვანელობენ, ეს არის ომი, რომელსაც სათავეში უდგას მთელი უკრაინელი ერი, რაც იმსახურებს ჩვენს აღტაცებას. მინდა, უკრაინის პირველ ლედის გადავცე ეს გზავნილი და სოლიდარობა ყველა ქართველი ქალის სახელით, რომელთაც ახლა მე წარმოვადგენ“, – განაცხადა სალომე ზურაბიშვილმა.
ოლენა ზელენსკამ თქვა, რომ უკრაინელი ქალები ისეთივე დამოუკიდებლები არიან, როგორც თავად უკრაინა და ისინი ახლა სწორედ ამ დამოუკიდებლობის და თავისუფლების შესანარჩუნებლად იბრძვიან.
www.radiotavisupleba.ge
Loading ...