სარეცხი მანქანების, მაცივრებისა და სხვა მოწყობილობების რეალიზაციის წესები იცვლება

სარეცხი მანქანების, მაცივრებისა და სხვა მოწყობილობების რეალიზაციის წესები იცვლება. საუბარია, ენერგოეტიკეტირებაზე, რომელიც მყიდველისთვის თვალსაჩინო ადგილას, გასაგებ, ამასთან, ქართულ ან ინგლისურ ენებზე უნდა იყოს განთავსებული.

როგორც შესაბამის დადგენილებებში ვკითხულობთ, ტექნიკურ რეგლამენტი 2025 წლის 31 დეკემბრიდან უნდა ამოქმედდეს.

შესაბამისი წესები ეტაპობრივად უკვე გამოქვეყნდა საკანონმდებლო მაცნეზე, სადაც ჩამოთვლილია ის მოწყობილობები, რომელსაც ენერგოეტიკეტირების რეგულაცია შეეხება. ესენია: სარეცხის მანქანა, საშრობ-სარეცხის მანქანა, მაცივარი, სავენტილაციო ერთეული (იგივე გამწოვი), სინათლის წყარო (ნათურა), მყარი საწვავის ბოილერი (ცენტრალური გათბობის ქვაბი), დამატებითი გამათბობელი და ა.შ.

ტექნიკური რეგლამენტი 48-გვერდიანია, სადაც დეტალურად არის გაწერილი, რა მოთხოვნებს უნდა აკმაყოფილებდეს ტექნიკა, რომლის რეალიზაციაც ქვეყანაში მოხდება. კერძოდ, ენერგოეფექტურობისა და აკუსტიკური ხმაურის ემისიების კლასები.

მაგალითად, სარეცხის მანქანის ეტიკეტი უნდა მოიცავდეს შემდეგ ინფორმაციას:

• 1. QR კოდი;
• 2. მიმწოდებლის სახელი და სასაქონლო ნიშანი;
• 3. მიმწოდებლის მოდელის იდენტიფიკატორი;
• 4. ენერგოეფექტურობის კლასების A-G სკალა;
• 5. ენერგოეფექტურობის კლასი განსაზღვრული I დანართის შესაბამისად;
• 6. შეწონილი ენერგომოხმარება ყოველ 100 ციკლზე კვტ.სთ-ში, დამრგვალებული უახლოეს მთელ რიცხვამდე III დანართის შესაბამისად;
• 7. გათვლილი ტევადობა, კილოგრამში, ეკო 40-60 პროგრამისთვის;
• 8. შეწონილი წყლის მოხმარება თითოეულ ციკლზე ლიტრში, დამრგვალებული უახლოეს მთელ რიცხვამდე III დანართის შესაბამისად;
• 9. ეკო 40-60 პროგრამის ხანგრძლივობა გათვლილი ტევადობით სთ:წთ-ში, დამრგვალებული უახლოეს წუთამდე;
• 10. გაწურვა-გაშრობის ეფექტურობის კლასი, განსაზღვრული I დანართის პირველი პუნქტის შესაბამისად;
• 11. გაწურვის ფაზის აკუსტიკური ხმაურის ემისიები გამოხატული დეციბელში 1 პიკოვატთან მიმართებით, დამრგვალებული უახლოეს მთელ რიცხვამდე, და აკუსტიკური ხმაურის ემისიის კლასი, განსაზღვრული I დანართის მე-3 პუნქტის შესაბამისად;
• 12. რეგლამენტის ნომერი #.

საქართველოში სარეცხის მანქანებთან, მაცივრებთან, ნათურებთან და სხვა მოწყობილობებთან ერთად, წყლის გამაცხელებლების რეალიზაციის წესიც იცვლება. საუბარია, ენერგოეტიკეტირებაზე, რომელიც მყიდველისთვის თვალსაჩინო ადგილას, გასაგებ, ამასთან, ქართულ ან ინგლისურ ენებზე უნდა იყოს განთავსებული.

დოკუმენტში ვკითხულობთ, რომ წყლის გამაცხელებლების, წყლის გამათბობლის, ცხელი წყლის შემნახველი ავზის, წყლის გამათბობლისა და მზის პანელის კომპლექტების რეალიზაციის დროს, ზედ განთავსებული უნდა იყოს პროდუქციის შესახებ დეტალური ინფორმაციის შემცველი ეტიკეტი (შესაბამისი ცხრილით).

ამასთან, ეტიკეტზე დატანილი უნდა იყოს შემდეგი ინფორმაცია:

I. მიმწოდებლის სახელწოდება ან სასაქონლო ნიშანი;

II. მიმწოდებლის მოდელის იდენტიფიკატორი;

III. წყლის გათბობის ფუნქცია, განსაზღვრული დატვირთვის პროფილის ჩათვლით, რომელიც გამოხატულია შესაბამისი ასოთი;

IV. წყლის გათბობის ენერგოეფექტურობის კლასი;

V. წლიური ელექტროენერგიის მოხმარება კვტსთ-ში საბოლოო ენერგიის თვალსაზრისით ან/და წლიური საწვავის მოხმარება გიგაჯოულში, GCV–ს თვალსაზრისით, დამრგვალებული უახლოეს მთელ რიცხვამდე, რომელიც გამოითვლება ამ ტექნიკური რეგლამენტის VII დანართის მე-4 პუნქტის შესაბამისად;

VI. ხმის სიმძლავრის დონე LWA, შენობაში, დეციბელში, დამრგვალებული უახლოეს მთელ რიცხვამდე;

აღნიშნული დადგენილების ფარგლებში, რეალიზატორებს ზედამხედველობის სააგენტო შეამოწმებს.