საპროტესტო აქციების დროს დაკავებული 11 პირი მოსამართლემ პატიმრობაში დატოვა

სასამართლომ იმსჯელა აღკვეთი ღონისძიების შეცვლაზე ბრალდებულებისთვის: ანდრო ჭიჭინაძე, ონისე ცხადაძე, გურამ მირცხულავა, ლუკა ჯაბუა, ჯანო არჩაია, რუსლან სივაკოვი, ვალერი თეთრაშვილი, გიორგი ტერიშვილი, ირაკლი ქერაშვილი, რევაზ კიკნაძე, სერგეი კუხარჩუკი.

დღევანდელ პროცესზე დაცვის მხარე ბრალდებულების აღკვეთი ღონისძიების გარეშე დატოვებას მოითხოვდა, ალტერნატივად კი პატიმრობის ნაცვლად გირაოს გამოყენების შუამდგომლობა ჰქონდა, თუმცა სასამართლომ მათი პოზიცია არ გაიზიარა და პროკურატურის შუამდგომლობა დააკმაყოფილა.

პროკურატურა შუამდგომლობაში ამტკიცებდა, რომ ბრალდებულების მხრიდან არსებობს როგორც მიმალვის, ასევე გამოძიებისთვის ხელის შეშლის და ახალი დანაშაულის ჩადენის საფრთხე, მსუბუქი ღონისძიების გამოყენების შემთხვევაში კი ეს საფრთხეები ვერ განეიტრალდება.

რაც შეეხება საქმის განხილვას, გუშინ, 9 იანვარს ცნობილი გახდა, რომ პროკურატურის შუამდგომლობის საფუძველზე წინასასამართლო სხდომა ორი თვით გადაიდო და 5 მარტს ჩაინიშნა.