აგრარულ საკითხთა კომიტეტმა “სურსათის დანაკარგებისა და სურსათის ნარჩენების შემცირებისა და სურსათის შეწირულობის შესახებ” კანონპროექტი მეორე მოსმენით მიიღო.
კანონპროექტის ერთ-ერთი ინიციატორის, პარლამენტის გარემოს დაცვისა და ბუნებრივის რესურსების კომიტეტის თავმჯდომარის პირველი მოადგილის, ხატია წილოსანის განცხადებით, “ინიციატივა მიმართულია იქითკენ, რომ საკვებად ვარგის სურსათს არსებობის ვადა გაუხანგრძლივდეს და ადამიანებს მათი გამოყენების შესაძლებლობა გაუჩნდეს. კანონპროექტის მთავარი მიზანია, რომ სურსათის ნარჩენად ქცევის პრევენცია მოხდეს.” მისივე თქმით, კანონპროექტს პირველ მოსმენაზე მხარი ერთხმად დაუჭირეს, მათ შორის ოპოზიციური პარტიების დეპუტატებმა.
სხდომაზე კანონპროექტში სურსათის ეროვნული სააგენტოს მიერ წარმოდგენილ შენიშვნებზეც იმსჯელეს; მათ შორის ტერმინი “სურსათის მიწოდების ჯაჭვის მონაწილე” ბიზნესოპერატორით შეიცვლება. ეს კი იმას ნიშნავს, რომ ფიზიკურ პირს დონაციის განხორციელება აეკრძალება.
კანონპროექტს მხარს უჭერს გაერო-ს სურსათისა და სოფლის მეურნეობის ორგანიზაცია FAO. საქართველოში მისი წარმომადგენლის, ჯუმბერ მარუაშვილის თქმით, FAO მხარს დაუჭერს უკვე კანონის აღსრულებასაც.
Loading ...