თბილისში 8 თებერვალს დაფუძნდა საერთო საზოგადოებრივი ასამბლეა. მისი დამფუძნებლები ამბობენ, რომ მათ მიზნებს შორისაა საზოგადოების გაერთიანება და დემოკრატიული მმართველობის ჩამოყალიბების ხელშეწყობა.
თეატრ-სახელოსნო 42-ში ჩატარებულ სადამფუძნებლო ყრილობაზე ასამბლეის წევრებმა განაცხადეს, რომ მათ ჩამოაყალიბეს “თვითორგანიზებული და მოხალისეობრივი გაერთიანება, რომელსაც მმართველი ორგანო არ ჰყავს”.
“ასამბლეა იქმნება საზოგადოების გაერთიანების პროცესის დაჩქარების, შეთანხმებული საზოგადოებრივი დაკვეთის მკაფიოდ ფორმულირების და საზოგადოებრივ-პოლიტიკურ პროცესებზე დადებითი გავლენის მიზნით”, – თქვა სიტყვით გამოსვლისას პაატა ციკოლიამ, ასამბლეის ერთ-ერთმა დამფუძნებელმა.
ასამბლეის წარმომადგენლების თანახმად, ამ ეტაპზე მათ შეუერთდა 25-ზე მეტი ინტერესჯფუფი და 3000-ზე მეტი ადამიანი, მათ შორის არიან სტუდენტები, იურისტები, ემიგრანტები, მასწავლებლები, მცირე მეწარმეები, კულტურის სფეროს წარმომადგენლები, სოციალური მუშაკები და არამხოლოდ.
“საქართველოს საზოგადოებრივი ასამბლეის მიზანია: სუვერენიტეტის დაბრუნება საქართველოს მოქალაქეებისთვის და დემოკრატიული სახელმწიფო მმართველობის ჩამოყალიბების ხელშეწყობა”, – თქვა სიტყვით გამოსვლისას ქეთი არჯევანიძემ, ასამბლეის საორგანიზაციო და საინიციატივო ჯგუფის წევრმა.
მისი თქმით, ამ მიზნების მისაღწევად, ასამბლეის ამოცანებს შორის იქნება სამართლიანი არჩევნების მხარდაჭერა, აქციების დროს უსამართლოდ დაკავებულების გათავისუფლება და საქართველოს ევროპული ინტეგრაციის ხელშეწყობა.
“ასამბლეაში გაწევრიანება შეუძლია ყველა ინტერესჯგუფს, ვინც იზიარებს მის პრინციპებს”, – თქვა ქეთი არჯევანიძემ, რომლის თანახმად, ასამბლეამ თითოეულ მოქალაქეს უნდა მისცეს საზოგადოებრივ ცხოვრებაში ჩართვის მექანიზმი.
ასამბლეის მორიგი ყრილობა ზუსტად ერთ კვირაში, 15 თებერვალს ჩატარდება.
ფოტო: euronewsgeorgia.com
Loading ...