Institute for the Study of War-ის ბოლო ანგარიშის მიხედვით, რუსეთის თავდაცვის სამინისტროს ოფიციალური პირების მტკიცების მიუხედავად, რუსი სამხედროები განაგრძობენ კიევის დასავლეთ-აღმოსავლეთით პოზიციების შენარჩუნებასა და ქალაქის მიმართულებით შეტევით ოპერაციებს ახორციელებენ. რუსეთის უმაღლესმა სარდლობამ, სავარაუდოდ, დაასკვნა, რომ ისინი ამჟამინდელი მდგომარეობით ვერ შეძლებენ კიევის აღებასა და ქალაქის ცენტრთან მიახლოებას. გავრცელებული ინფომარციით, რუსეთის სამხედრო ძალებმა შეცვალეს სტრატეგია და ქვედანაყოფებმა, რომლებმაც დიდი ადამიანური ზარალი განიცადეს, შეწყვიტეს უიმედო შეტევითი ოპერაციების განხორციელება. ამასთან ერთად, ოკუპანტებმა სამხედრო ძალების ერთ ადგილას კონცენტრირების ნაცვლად, ცალკეული ბატალიონის ტაქტიკური ჯგუფების შეყვანის გადაწყვეტილება მიიღეს. რუსი ოფიციალური პირები ამ მიდგომას, სავარაუდოდ, სამხედრო რეალობიდან გამომდინარე იღებენ, ვინაიდან ვერ ახერხებენ კიევის აღებას. სავარაუდოდ, რუსეთის ოფიციალური პირების ეს გადაწყვეტილება განპირობებულია სამხედრო რეალობისგან გამომდინარე და ცდილობენ კიევის მიმართულებით ოპერაციის წარუმატებლობა დაფარონ ისე, თითქოს ცეცხლის შეწყვეტის ან სამშვიდობო მოლაპარაკებებში სერიოზულად ჩართვა სურთ.
ოკუპანტები უკრაინის ჩრდილო-აღმოსავლეთში განაგრძობენ შეტევით ოპერაციებს. სავარაუდოდ, მათი მიზანია ხარკოვისა და იზიუმის სამხრეთ-აღმოსავლეთით და ლუგანსკის ოლქის ძალების ერთმანეთთან დაკავშირება. გავრცელებული ინფორმაციით, რუსებმა სამხედრო ძალები ჩერნიგოვი-ხარკოვიდან იზიუმ-სლავიანსკის მიმართულებით გადაანაწილეს. სავარაუდოდ, მათ დაიწყეს უკრაინაში განლაგებული დაყოფების გამაგრება, საომარ მოქმედებებში უკვე ჩართული ძალაების გადანაწილების ნაცვლად.
რუსეთის სამხედროები მარიუპოლში კვლავ სტაბილურ, ნელ პროგრესს აღწევენ. უკრაინის თავდაცვა განაგრძობს ქალაქის დაცვას, თუმცა, დიდი ალბათობით, ოკუპანტები ქალაქის აღებას რამდენიმე დღეში მოახერხებენ. მარიუპოლში ურბანული ბრძოლებისა და მძიმე კონტრშეტევების შემდგომ, რუსულმა სამხედრო ძალებმა დიდი ადამიანური დანაკლისი განიცადეს. შესაბამისად, რთულია იმის თქმა, თუ როგორი ტიპის შეტევებს განაგრძობს რუსეთი მარიუპოლში.
რუსეთის ოპერაციებმა უკრაინის სამხრეთ-აღმოსავლეთ ნაწილში, დონეცკის რეგიონის დიდი ნაწილი უკრაინის კონტროლის ქვეშ დატოვა. თუმცა, დონეცკისა და ლუგანსკის ოლქის საზღვრების დაცვა, დიდ ძალისხმევას საჭიროებს. დონეცკის ოლქის ტერიტორიის დიდი ნაწილი, რომელიც რუსეთის კონტროლს არ ექვემდებარება, არის გაშლილი და თითქმის დაუსახლებელი. მსგავსს რელიეფზე რუსულმა სამხედრო ძალებმა ომის ადრეულ პერიოდში წარმატებას მიაღწიეს. თუმცა, ბოლო დროს, ამ ზედაპირზე რუსეთის შეტევითი ოპერაციები მიზანს ვერ აღწევს. ამასთან ერთად, ნაადრევია იმის თქმა, ამჟამინდელი მდგომარეობით რამდენად შეძლებს რუსული სამხედრო ძალები დონეცკისა და ლუგანსკის დაკავებას.
ISW-ს ძირითადი დასკვნები:
- რუსული ძალები კიევის მახლობლად პოზიციების შენარჩუნებას განაგრძობენ. ოკუპანტების ჯარები, რომლებმაც ქალაქი დატოვეს, ფრონტის ხაზის უკან, ჩრდილოეთით, ბელარუსის პოზიციებისკენ მიემართებიან.
- რუსეთი ლუგანსკის ფრონტის ხაზთან ხარკოვისა და იზიუმის სამხრეთ-აღმოსავლეთით მიღწევების დასაკავშირებლად იწყებს რეზერვების გადასროლას
- უკრაინის სამხედრო ძალები აგრძელებენ მარიუპოლის დაცვას. ISW-ს ანგარიშის მიხედვით, მოსალოდნელია, რომ ქალაქი რამდენიმე დღეში დაეცემა.
- რუსეთის მხრიდან მოსალოდნელია დონეცკის არაოკუპირებული რეგიონების ასაღებად შეტევითი ოპერაციების განხორციელება. ქალაქის აღების შემთხვევაში, გაურკვეველია შეძლებს თუ არა რუსეთი საკმარისი სამხედრო ძალების შენარჩუნებას ან დანაყოფებიდან ხალხის დამატებას, რათა მიზანს მიაღწიოს.
გავრცელებული ინფორმაციით, რუსეთი კვლავ ცდილობს ახალი საბრძოლო ძალების გამომუშავებასა და აღჭურვილობის შევსებას. 29 მარტს, უკრაინის გენერალური შტაბის ინფორმაციით, რუსეთის სამხედრო ძალები საბრძოლო აღჭურვუილობას ბოგუჩარიდან, ვორონეჟის ოლქის გრძელვადიანი საწყობიდან გამოტანას ცდილობენ, თუმცა აღსანიშნავია, რომ აღჭურვილობის 40% უფუნქციოა. გენშტაბის მტკიცებით, რუსეთის მხრიდან წყნარი ოკეანის ფლოტიდან რეზერვის მობილიზების მცდელობა წარუმატებლად დასრულდა, ვინაიდან ყველა ბატალიონმა ომზე უარი თქვა. ISW-ს ინფორმაციით, 29 მარტს რუსეთის თავდაცვის მინისტრის, სერგეი შოიგუს თქმით, რუსეთი წვევამდელებს „ცხელ წერტილებში“ არ განათავსებს. 28 მარტს, დიდი ბრიტანეთის თავდაცვის სამინისტროს მტკიცებით, აღმოსავლეთ უკრაინაში საბრძოლო დანაკარგების ასანაზღაურებლად ვაგნერის ჯგუფი დამატებით სამხედო ძალას აგზავნის.
Loading ...
