ასე გაგრძელება შეუძლებელია, ასე, რომ მოვუწოდებ ჯანდაცვის სამინისტროს, შეხვდეს კონსილიუმს და გადაწყვიტონ, რას ვუშვებით ჩვენს პრეზიდენტს, გადაგვყავს საქალაქო საავადმყოფოში, თუ არა – პრეზიდენტის მდგომარეობა დღეს იყო უარესი, ვიდრე გუშინ, – ამის შესახებ ყოფილი პრეზიდენტის მიხეილ სააკაშვილის პირადმა ექიმმა ნიკოლოზ ყიფშიძემ გლდანის 18-ე პენიტენციური დაწესებულებიდან გამოსვლის შემდეგ განაცხადა, სადაც მიხეილ სააკაშვილი მოინახულა.
მისი თქმით, მიხეილ სააკაშვილს კალიუმის მაჩვენებელი კრიტიკულად დაბალ დონეზე აღენიშნებოდა და ასევე, ჰქონდა მაღალი წნევა.
„პრეზიდენტის მდგომარეობა დღეს იყო უარესი, ვიდრე გუშინ. ერთ-ერთი მაჩვენებელი კალიუმი იყო ძალიან დაბალი, კრიტიკულ დონეზე იყო და შევძელით მისი აწევა, მაგრამ ეს მოხდა გადასხმის გარეშე, რადგან პრეზიდენტი უარს აცხადებს აქ მკურნალობაზე, მოგვიხდა ტაბლეტირებული ფორმების გამოყენება. ასევე, პრობლემები აქვს წნევასთან, მაღალი წნევა ჰქონდა“, – განაცხადა ნიკოლოზ ყიფშიძემ.
რაც შეეხება მიხეილ სააკაშვილის სხეულზე დაზიანებებს, როგორც ექიმი აცხადებს საჭიროა დამატებითი გამოკვლევები, რომ ინახოს კანქვეშა ჰემატომები, დაბეჟილობები და ა.შ.
ნიკოლოზ ყიფშიძემ აღნიშნა, რომ ექიმების კონსილიუმის შემადგენლობას, მისი შეფასებით, დამატებით სხვა სპეციალობის ექიმები უნდა დაემატოს.
Loading ...