პატიმრობაში მყოფი საქართველოს მესამე პრეზიდენტი მიხეილ სააკაშვილი ამბობს, რომ საქართველოს პატრიარქის, ილია მეორის წერილში ნახსენები “სულიერი რეალობა” მის ციხეში ყოფნას არ უკავშირდება. ამ შინაარსის პოსტი ექსპრეზიდენტის ფეისბუკგვერდზე გამოქვეყნდა.
“მინდა ვუპასუხო მათ, ვინც “სულიერი რეალობა” რაღაცნაირად ციხეს დაუკავშირა, მათ გამორჩათ სიტყვა “სულიერი”.
ბოლო წლის გნამავლობაში მე მართლაც გავძლიერდი სულიერად: პირველად მრავალგზის ვეზიარე, ჩავაბარე აღსარება, გავიარე ზეთისცხება და რაც მთავარია, მქონდა ბევრი ლოცვის დრო და შესაძლებლობა.
რაც შეეხება ციხეს, უკრაინელი მებრძოლების მთავარი ლოზუნგია – თავისუფლება ან სიკვდილი, ასე რომ გაიმარჯვებს თავისუფლება”, – წერია მიმართვაში.
გუშინ, 5 იანვარს, მედიას მიხეილ სააკაშვილის თანაგუნდელმა და მეგობარმა ეკა ხერხეულიძემ მიაწოდა საქართველოს პატრიარქის წერილი, რომლითაც ის მადლობას უხდიდა ექსპრეზიდენტს აღსაყდრების დღის მილოცვისთვის.
“ბატონო მიხეილ, გულითად მადლობას გიხდით აღსაყდრების დღის მოლოცვისათვის, მეც გილოცავთ დაბადების დღეს და დამდეგ შობა-ახალ წელს.
გისურვებთ ჯანმრთელობას, მხნეობასა და, პირველ რიგში, ღვთის შეწევნას თქვენს სულიერ ძალთა განსამტკიცებლად და ჭეშმარიტი სხვა რეალობის შესაცნობად”, – წერია მიხეილ სააკაშვილისთვის ილია მეორის სახელით გაგზავნილ წერილში, რომელიც 2022 წლით არის დათარიღებული.
www.radiotavisupleba.ge
Loading ...