რუსული კანონის აქციაზე დაკავებულმა, გიორგი მექვაბიშვილმა “ოცნების” ხელისუფლებას სტრასბურგის სასამართლოში დავა მოუგო

რუსული კანონის აქციაზე დაკავებულმა გიორგი მექვაბიშვილმა ოცნების ხელისუფლებას სტრასბურგის სასამართლოში დავა მოუგო. მექვაბიშვილის უფლელებს საია იცავდა.

2023 წლის 7-8 მარტს, პარლამენტის მიმდებარედ, “რუსული კანონის” წინააღმდეგ გამართული მასობრივი აქციის დროს გიორგი მექვაბიშვილი ადმინისტრაციულ სამართალდარღვევათა კოდექსის 173-ე და 166-ე მუხლების საფუძველზე დააკავეს, რაც წვრილმანი ხულიგნობას და პოლიციელის მოთხოვნაზე დაუმორჩილებლობას გულისხმობს. მექვაბიშვილი აქციაზე სამართალდამცავი უწყების წარმომადგენელთა ძალადობრივ ქმედებას ტელეფონით იღებდა და სამართალდამცავებს მოუწოდებდა, არ ეძალადათ აქციის მონაწილეზე. საქმის ერთადერთი მოწმე პოლიციელის განმარტებით, გიორგი მექვაბიშვილი არ დაემორჩილა პოლიციის კანონიერ მოთხოვნას გაეთავისუფლებინა გზის სავალი ნაწილი, რაც გახდა მისი დაკავების საფუძველი, ხოლო შემდგომ სამართალმდარღვევად ცნობის საფუძველი.

მექვაბიშვილმა წინასწარი დაკავების იზოლატორში 35 საათი გაატარა და მოგვიანებით სასამართლომ მას 2 000-ლარიანი ჯარიმის გადახდა დააკისრა.

საია-ს ინფორმაციით, სტრასბურგის სასამართლომ წარდგენილი საჩივარი განიხილა ევროპული კონვენციის მე-6 (საქმის სამართლიანი განხილვის უფლება), მე-10 (გამოხატვის თავისუფლება) და მე-11 (შეკრების თავისუფლება) მუხლების ჭრილში.

საია-ს თავმჯდომარის, თამარ ონიანის განცახდებით, საიამ მნიშვნელოვანი საქმე მოიგო ევროსასამართლოში — სტრასბურგის სასამართლომ საქართველოს სასამართლოების მიერ დემონსტრანტისთვის თითქმის ექსკლუზიურად პოლიციის დაუსაბუთებელი ჩვენების საფუძველზე “გამამტყუნებელი განაჩენის” გამოტანა დაგმო და უსამართლოდ მიიჩნია.

“დღეს საიამ მნიშვნელოვანი საქმე მოიგო ევროსასამართლოში (მექვაბიშვილი საქართველოს წინააღმდეგ; no. 37567/23).

ეს არის პირველი საქმე, რომელზეც 2023 წლის “რუსული კანონის” საწინააღმდეგო პროტესტის კონტექსტში გამოვიდა გადაწყვეტილება. სტრასბურგის სასამართლო გმობს საქართველოს სასამართლოების მიერ დემონსტრანტისთვის თითქმის ექსკლუზიურად პოლიციის დაუსაბუთებელი ჩვენების საფუძველზე “გამამტყუნებელი განაჩენის” გამოტანას (სამართალდამრღვევად ცნობას).

სტრასბურგის მითითებით, ეროვნულ დონეზე სასამართლოების მიერ საერთოდ უგულვებელყოფილი იყო პროტესტის კონტექსტი ადმინისტრაციული სამართალდარღვევის განხილვისას.

ეს პრაქტიკა სწორედ ასე აქვს საიას თავის დოკუმენტირების ანგარიშებშიც შეფასებული, რომელიც 2023 წლის პროტესტებს ეხებოდა. ასეთი პრაქტიკის შედეგად ასობით ადამიანია დაზარალებული — სამართლიანი სასამართლოს გარეშე სამართალდამრღვევად ცნობილი.
დიდი მადლობა ჩვენს ყველა იურისტს, რომელიც როგორც ეროვნულ, ისე საერთაშორისო დონეზე აწარმოებდა ამ საქმეს. ახლა მუშაობას მისი აღსრულების კონტექსტში განვაგრძობთ,” — წერს ონიანი.

სტრასბურგის სასამართლოს გადაყვეტილებით მთავრობამ მომჩივან მექვაბიშვილს მატერიალური ზიანის ანაზღაურების მიზნით € 665 უნდა გადაუხადოს, ხოლო არამატერიალური ზიანისთვის — €1600.