რუსეთში “ნატახტარის” ლიმონათის წარმოება იწყება

რუსეთში დაფუძნებული ლუდსახარში კომპანია AB InBev Efes ქართული “ნატახტარის” ლიმონათის რუსეთში წარმოებას იწყებს. ინფორმაციას სახელისუფლებო მედია Tass-ი ავრცელებს.

როგორც AB InBev Efes-ის გენერალურმა დირექტორმა, ნიკოლაი ტიურნიკოვმა თქვა, “ნატახტარის” ლიმონათის წარმოების დაწყება უალკოჰოლო გაზიანე სასმელებზე არსებული მზარდი მოთხოვნითაა განპირობებული.

“რუსულ საწარმოებში “ნატახტარის” წარმოება დავიწყეთ. ეს არის ახალი ეტაპი ჩვენი ლეგენდარული ბრენდების პორტფელის განვითარებაში. 2022 წლიდან უალკოჰოლო გაზიანი სასმელების კატეგორიამ სტაბილური ზრდა აჩვენა: ნატურალური თვალსაზრისით +7%-ზე მეტი მოცულობით და ფულადი თვალსაზრისით +30%. “ნატახტრის” ლოკალიზაცია – სტრატეგიული ნაბიჯია, რომელიც საშუალებას მოგვცემს, რომ პროდუქტი რუსი მომხმარებლებისთვის ხელმისაწვდომი გახდეს, შენარჩუნებული იქნება გემო და ხარისხი”, – თქვა ტიურნიკოვმა.

რუსეთში “ნატახტარის” ლიმონათის წარმოება ივანოვოსა და ომსკის ქარხნებში განხორციელდება; ის წარმოებული იქნება 0.5-ლიტრიან შუშის ბოთლებში, ასევე 1-ლიტრიან და 1.5-ლიტრიან პლასტმასის ბოთლებში. გაიყიდება ლიმონათის 4 გემო: მსხალი, ტარხუნა, საფერავი და ფეიხოა.