რუსეთიდან სატვირთოების მძღოლების მასობრივი დეპორტაციის პროცესი მიმდინარეობს – ამის შესახებ სატრანსპორტო დერეფნის კვლევის ცენტრი წერს. მათივე ინფორმაციით, ცენტრალური აზიის სატვირთოების მძღოლებს სადგომებზე აკავებენ და დადგენილი საემიგრაციო 90-დღიანი ვადის გადაჭარბების შემთხვევაში, ხუთწლიანი ხელახლა შესვლის აკრძალვით დეპორტაციას უფორმებენ. TCRC წერს, რომ ანალოგიური პრობლემის წინაშე შესაძლოა, მალე ქართველი გადამზიდავებიც აღმოჩნდნენ. ამიტომ ცენტრში თვლიან, რომ აუცილებელია ასეთ დროს, საქართველომ ჩრდილოელ მეზობელს „სარკისებრი“ რეგულაციები დაუწესოს.
„დღეისათვის ამ კატეგორიის მძღოლებისთვის დეპორტაციამ მასობრივი ხასიათი მიიღო და რუსეთის მოსაზღვრე ცენტრალური აზიის ქვეყნების სატვირთოების მძღოლების დიდი უკმაყოფილება გამოიწვია.
მიუხედავად იმისა, რომ რიგი ქვეყნები – ყაზახეთი, ყირგიზეთი და სომხეთი – რუსეთთან ერთად ЕАЭС-ის (ევრაზიული ეკონომიკური კავშირის) წევრები არიან, ხოლო მათ შორის მოქმედი შეთანხმება საქონლის თავისუფალ გადაადგილებასა და გამარტივებულ სატრანსპორტო ურთიერთობების პრინციპებს ემყარება, რუსეთის მიერ ცალმხრივად სატრანსპორტო საშუალებების მძღოლების დეპორტაციამ სახელმწიფო დონეზე დამატებითი უკმაყოფილება გამოიწვია. უფრო მეტიც, გაისმა მოწოდებები ევრაზიული ეკონომიკური კავშირის დატოვების შესახებ.
რუსეთის მხრიდან ევრაზიული ეკონომიკური კავშირის წევრი ქვეყნების მძღოლების მიმართ დეპორტაციის ამოქმედებამ ბევრი კითხვის ნიშანი დაბადა – თუ რუსეთი ასე ექცევა მის „სატელიტ“ЕАЭС-ის ხელშეკრულებით დაქვემდებარებულ ქვეყნებს, საქართველოს მიმართ მისი ქმედება ბუნებრივია, ბევრად უფრო აგრესიული და რთულად დასარეგულირებელი იქნება?!.
აღსანიშნავია, რომ დეპორტაციის საფრთხის ქვეშ აღმოჩნდნენ რუსეთიდან ზემო ლარსის გავლით მოძრავი სატრანსპორტო საშუალებების მძღოლები, მათ შორის პირველ რიგში – ქართველი მძღოლები. ცნობისათვის დეპორტი არ ვრცელდება ბელარუს გადამზიდავებზე.
არსებული ინფორმაციით, ქართველ მძღოლებს შორის უკვე ფიქსირდება პირველი დაჯარიმების და დეპორტირების შემთხვევები. ასეთ პირობებში ქართველი მძღოლი, მომდევნო რეისის განხორციელებისას, სავარაუდო დეპორტის საფრთხის გამო, აღმოჩნდა არაპროგნოზირებად და რთულ მდგომარეობაში.
ამასთან, TCRC სოციალურ ქსელში ქართველი მძღოლების შეფასებაზე წერს:
„რუსეთმა უკვე შეგვზღუდა – 180 დღის ნაცვლად დაგვიწესა 90 დღე. საქართველოს გადამზიდავები, ვინც რუსეთში დადის, ყველას გადაცდენა აქვს. რუსი ჩვეულებრივ 365 დღე ჩერდება საქართველოში. რატომ არის ასეთი უთანასწორობა? ამიტომ გვჭირდება სახელმწიფოს დახმარება.“
„ჯარიმას თუ გამოხვალ, კიდევ კარგია – მძღოლების უმეტესობას 5-წლიან დეპორტს ურტყამენ.“
„მძღოლებზე მაინც დაეტოვებინათ 180 დღე. ვის მივმართოთ, სად წავიდეთ, სად გავარკვიოთ? ვიზებსაც არ გვაძლევენ. მე პირადად გავაჩერე მანქანა – სესხით ვისაც აქვს ნაყიდი, იმან რა ქნას, სად წავიდეს?“
ამასთან, ქართველი მძღოლების განმარტებით, ზემო ლარსის სასაზღვრო გამშვებ პუნქტზე ორივე მხრიდან ხშირად 10-14 დღიანი რიგებია, (გაუსაძლისი რიგები შესამჩნევი იყო მაისი – სექტემბრის ჩათვლით) რასაც ემატება რუსეთის ტერიტორიაზე ტვირთის დანიშნულების ადგილზე ჩატანის, შემდგომ განბაჟება და გადმოტვირთვის გაჭიანურებული პროცედურები, უკანა მიმართულებით ტვირთის მოძიება – დატვირთვა და ზემო ლარსის საზღვამდე ტრანსპორტირება.
„ერთობლიობაში რუსეთის ტერიტორიაზე ერთი ბრუნის შესრულება საშუალოდ 20–25 დღემდე იკავებს. ასეთ პირობებში, ფაქტობრივად, ოთხ თვეში ქართველ მძღოლს ეწურება რუსეთის ტერიტორიაზე ყოფნის 90-დღიანი ლიმიტი.
Loading ...