''როცა გურიაში ჩამოვდივარ, ჩემი გული სხვანაირად ფეთქავს'' – ლევან ვასაძე გურიის შესახებ

დღეს ლევან ვასაძე გურიაში იმყოფებოდა. ბიზნესმენი და პოლიტიკოსი ჭადრების ბაღში მოსახლეობას შეხვდა: – ”მე გურიისადმი სუბიექტური ვარ, რადგან გურული ვარ მამითაც და დედითაც. ჩემი გული სხვანაირად ფეთქავს, როცა ჩემს მშობლიურ მხარეში ჩამოვდივარ. გურია ჩემთვის საერთოდ სხვა არის. მე ღრმად მწამს, რომ ამ მხარეს ბევრად დიდი პოტენციალი აქვს, ვიდრე ეს ჩანს და ამ პოტენციალის გასაღვივებლად და განსახორციელებლად ჩვენ გვჭირდება ადგილობრივი წარმოების განვითარება, ეს არის ანა-ბანა. თუ ჩვენ ვერ შევქმნით პირობებს, რათა გურული სოფლის მეურნეობის წარმოება ავიდეს ხარისხობრივად სხვა დონეზე, გავაგრძელებთ ყოფნას იმ ჭაობში, რომელშიც ვართ. გარდა ამისა, გურიას გააჩნია საოცარი ტურისტული პოტენციალი, მაგრამ ეს არის ბევრად უფრო მყიფე და არასტაბილური პანდემიის და საერთოდ მომავალი წლების პერსპექტივაში. არ შეიძლება ერთ ლიანდაგზე შეაყენო ეკონომიკა და თქვა, რომ ჩვენ ყველა ვიქცევით მომსახურების სფეროდ. არაფერი საწინააღმდეგო მე ტურიზმის არ მაქვს, მაგრამ ეკონომიკას აუცილებლად სჭირდება დივერსიფიკაცია. გარდა ამისა, არის ძალიან საინტერესო, სასარგებლო წიაღისეულის რამდენიმე კერა გურიაში, რომლის ნაწილიც დამუშავებულია, ნაწილი – ხელუხლებელი. ამასაც სჭირდება პატრონობა და მიზანმიმართული ეკონომიკური გეგმა სახელმწიფოს მხრიდან.” – განაცხადა ლევან ვასაძემ.