რომელმა პარტიებმა შეწყვიტეს საპარლამენტო საქმიანობა

ფრაქცია ნაციონალური მოძრაობა საპარლამენტო საქმიანობას ოფიციალურად წყვეტს – ამის შესახებ განცხადება პარლამენტში, პარტიის ერთ-ერთმა ლიდერმა ლევან ბეჟაშვილმა გააკეთა. ბეჟაშვილის თქმით, მიხეილ სააკაშვილის პატიმრობაში დატოვებით, ქვეყანაში გაფორმდა რუსული ოლიგარქიული რეჟიმის მიერ მიხეილ სააკაშვილის მიმართ წამების, არაადამიანური მოპყრობისა და განზრახ მკვლელობის ფაქტი.

“ამ გადაწყვეტილებით კიდევ ერთხელ დამტკიცდა, რომ სასამართლო ფიქცია და პოლიტიკური შურისძიების იარაღია” -განაცხადა ბეჟაშვილმა მოსამართლე არევაძის გუშინდელ გადაწყვეტილებასთან დაკავშირებით, რომელმაც მესამე პრეზიდენტს საზღვარგარეთ მკურნალობის უფლება არ მისცა და პატიმრობაში დატოვა.

ენმ-ში თვლიან, რომ სასამართლოს პოლიტიკური გადაწყვეტილება საქართველოს ევროპული პერსპექტივის წინააღმდეგაა მიმართული, რადგან ევროკავშირის კანდიდატის სტატუსის მინიჭება, დასავლელი პარტნიორების მხრიდან უკავშირდებოდა სამართლებრივ მოლოდინებს.

რაც შეეხება მანდატების დატოვებას, ენმ-ში არც ამას გამორიცხავენ და ამბობენ, რომ გადაწყვეტილებას კონსულტაციების შედეგად მიიღებენ:

“ფრაქცია ენმ იღებს გადაწყვეტილებას და აღარ მიიღებს საპარლამენტო საქმიანობაში მონაწილეობას, რაც გულისხმობს არც სესიებზე დასწრებას, არც საკომიტეტო მოსმენებზე. იმავდროულად, პარტია და ფრაქცია  გააგრძელებს კონსულტაციებს პროტესტის კიდევ უფრო მძიმე ფორმებზე -საუბარია  მანდატების დატოვებაზე და ამ საკითხზე კონსულტაციები გვექნება ევროპელ პარტნიორებთან, საპარლამენტო და არასაპარლამენტო ოპოზიციასთან.” განაცხადა ბეჟაშვილმა.

საპარლამენტო საქმიანობას წყვეტს “სტრატეგია აღმაშენებელიც”.

საპარლამენტო საქმიანობას „სტრატეგია აღმაშენებელიც“ წყვეტს – აღნიშნულის შესახებ პარტიის წევრმა პაატა მანჯგალაძემ „ინტერპრესნიუსთან” განაცხადა.

როგორც მან აღნიშნა, ისინი შეეცდებიან კოორდინაციას და საერთო სამოქმედო გეგმაზე მუშაობას, თუმცა იმ შემთხვევაში, თუ ერთიანი სამოქმედო გეგმა არ იქნება, „იტოვებენ უფლებას, რომ რასაც საჭიროდ ჩათვლიან, ის გააკეთონ“.

„ჩვენ ვამბობთ, რომ საჭიროა ერთიანი სამოქმედო გეგმა, კოორდინაცია მაინც ოპოზიციურ პარტიებს შორის, რასაც ჯერ ვერ ვხედავთ, მაგრამ ახლა რა მოცემულობაც არის, გადავდგამთ ამ ნაბიჯს, რომ შევწყვეტთ საპარლამენტო საქმიანობას და შევეცდებით საერთო სამოქმედო გეგმა იყოს. თუ ასეთი გეგმა ვერ ვნახეთ, ვიტოვებთ უფლებას, რომ რასაც საჭიროდ ჩავთვლით, ის გავაკეთოთ,”- განაცხადა მანჯგალაძემ.