რომელ პროდუქტებზე ძვირდება წინასაახალწლოდ ფასები და რატომ – დისტრიბუტორთა ასოციაცია მიზეზებზე

„წინასაახალწლო პერიოდში გაძვირებული იქნება მხოლოდ ნიგოზი, გოჭი და ინდაური, რადგან წინასაახალწლოდ ფერმერები შეეცდებიან, რომ ნახონ წლის განმავლობაში ყველაზე დიდი მოგება“, – აღნიშნავს ივა ჭყონია.

რაც შეეხება სხვა ძირითად პროდუქტებს, ტკბილეულსა და სასმელებს – ასოციაციის პრეზიდენტის თქმით, სუპერმარკეტები საკმაოდ შეღავათიან ფასებში სთავაზობენ მოსახლეობას ალკოჰოლურ და გამაგრილებელ სასმელებს, შოკოლადებთან და სხვა სახის ტკბილეულთან ერთად. აქედან გამომდინარე, წლის ამ მონაკვეთში, წინასაახალწლოდ, მსგავსი პროდუქტების ყიდვა მაღაზიებში ყველაზე დაბალ ფასად არის შესაძლებელი.

ის ასევე ეხმიანება რუსეთიდან ტკბილეულის, განსაკუთრებით კი შოკოლადის გაზრდილ იმპორტს და ამის მთავარ მიზეზებზე საუბრობს. ჭყონია ამბობს, რომ ექსპორტი მხოლოდ საქართვლოში არსებული დიდი მოთხოვნიდან გამომდინარეა გაზრდილი. არაერთი საერთაშორისო ბრენდი, რომელიც პოსტსაბჭოთა სივრცესა და საქართველოში ოპერირებს, პროდუქციას რუსეთში აწარმოებს და იქედან ახდენს ჩვენამდე მოწოდებას, რადგან რუსეთში წარმოება და შემდგომ იქედან საქართველომდე ტრანსპორტირება ბევრად იაფი უჯდებათ.

„საერთაშორისო ბრენდები წყვეტენ, თუ საიდან უნდა შემოვიდეს პროდუქტი ჩვენს ქვეყანაში. შეიძლება ბრენდი იყოს თურქული, ან პოლონური, მაგრამ ქარხანა რუსეთში ჰქონდეს გახსნილი. გაზრდილი მოთხოვნისა და რუსეთში არსებული დაბალი ფასების გამო კი, გასცეს დირექტივა, რომ ესა თუ ის პროდუქტი საქართველოში რუსეთიდან წამოიღონ. ეს იმიტომ კეთდება, რომ მოსახლეობას დახლები ცარიელი არ დახვდეს. მოთხოვნის ზრდა კი, რა თქმა უნდა, წინასაახალწლო პერიოდითაა გამოწვეული“, – განმარტა ივა ჭყონიამ „პალიტრანიუსთან“.