პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია მაუწყებლობის შესახებ კანონში დაგეგმილი ცვლილებების საკითხს ეხმაურება, რომლის განხილვაც პარლამენტში გუშინ ხმაურით მიმდინარეობდა.
კაკულიას თქმით, კანონში შესატანი ცვლილებებს გაიწვევენ და შექმნილ ფონზე მისი მიღება არასწორი იქნება. “ცვლილებები „მაუწყებლობის შესახებ“ კანონში გაწვეული იქნება იმიტომ, რომ დღეისთვის, წინასაარჩევნოდ, ასეთი მოცემულობით ამ თემის განხილვა არ არის საჭირო, რაც შეეხება ოპერატორებს, მიუხედავად იმისა, რომ კანონი დაჩქარებულია, არ ნიშნავს იმას, რომ დაცული არ უნდა იყოს კანონის მიღების თუნდაც მინიმალური სტანდარტები. აშკარად ჩანდა, რომ კომუნიკაციის ნაკლებობა იყო და დაჩქარებულ დროში, ხვალ-ზეგ შევეცდებით, მაქსიმალურად გამოვიყენოთ, რათა კომუნიკაციის დეფიციტი აღმოვფხვრათ და ყველა ის არგუმენტი, რომელიც არსებობს სექტორში, კიდევ ერთხელ იყოს გააზრებული მარეგულირებელთან ერთად. კანონის არათუ გამკაცრება, არამედ იმ ინსტრუმენტის შემოღება ხდება, რომელმაც ძალიან მძიმე სანქციების გამოყენების აუცილებლობა არ უნდა გახადოს საჭირო.
ამასთანავე, კაკულია განმარტავს, რომ ოპერატორები არ არიან წინააღმდეგები, რომ ამგვარი ცვლილები კანონში შევიდეს, თუმცა აუცილებელია დროებითი მმართველის დანიშვნის მიზეზებისა და კონკრეტული გარემოებების დასახელება.
კაკულიას თქმით, ყველაფერი ისე უნდა გაკეთდეს, რომ სექტორს არ დარჩეს იმის განცდა, თითქოს რეგულაციები ბოროტად და მათი ინტერესების საწინააღმდეგოდ იყოს გამოყენებული.
მაუწყებლის შესახებ კანონში ინიცირებული ცვლილებების განხილვას პარლამენტში გუშინ ხმაური მოჰყვა. ინიციატივა გააკრიტიკეს კავკასუს ონლაინის დამფუძნებელმა, გია ჯოხთაბერიძემ, სილქნეტის დამფუძნებელმა და მფლობელმა გიორგი რამიშვილმა და, ასევე, იმედის მფლობელმა, ირაკლი რუხაძემ.
კომუნიკაციების მარეგულირებელი კომისიის ახალი საკანონმდებლო ინიციატივით, რომელიც მაუწყებლობის შესახებ და ელექტრონული კომუნიკაციების შესახებ კანონებს ეხება, კომისიამ, შესაძლოა, მედიებში სპეციალური მმართველი დანიშნოს. კანონპროექტის მიღების შემთხვევაში სპეციალური მმართველი ორი წლამდე ვადით დაინიშნება.
ამასთან, მაუწყებლობის შესახებ კანონში კიდევ ერთი ცვლილება შედის, რომლის მიხედვითაც მედიის მხრიდან მარეგულირებელი კომისიის გადაწყვეტილების სასამართლოში გასაჩივრება არ გამოიწვევს აღსრულების შეჩერებას საქმის დასრულებამდე, როგორც ეს მანამდე ადმინისტრაციული კოდექსით იყო გათვალისწინებული.
Loading ...