როდის დაიწყება გომისმთაზე მიწების რეგისტრაცია

1 ივლისიდან საქართველოს 7 მაღალმთიან დასახლებაში  მიწების სისტემური რეგისტრაცია დაიწყება. მათ შორის არის კურორტი გომისმთაც. სახელმწიფო კურორტზე მიწების რეგისტრაციის პროცესს თავად, ბაზაში არსებული დოკუმენტაციის საფუძველზე დაიწყებს.ხოლო მოქალაქეებს, ვისაც სურს თავად მიმართოს სახელმწიფოს და რეგისტრაციამდე ან მას შემდეგ, პროცესში კორექტივები შეიტანოს, საჯარო რეესტრში მიწის აზომვითი ნახაზი და უფლების დამდგენი დოკუმენტი უნდა წარადგინოს.

დასახლებები, სადაც მიწის სისტემური რეგისტრაცია დაიწყება:

• ლენტეხის მუნიციპალიტეტის ჟახუნდერისა და ჩიხარეშის ადმინისტრაციული ერთეულები;
• ამბროლაურის მუნიციპალიტეტის  ხვანჭკარისა და ჭრებალოს ადმინისტრაციული ერთეულები;
• ონის მუნიციპალიტეტის გომისა და ღების ადმინისტრაციული ერთეულები.
• ოზურგეთის მუნიციპალიტეტის დაბა გომისმთის დასახლება;

გომისმთას სტატუსი ოზურგეთის საკრებულოს 2020 წლის 31 მარტის განკარგულებით მიენიჭა [ოზურგეთის მუნიციპალიტეტის ადმინისტრაციულ საზღვრებში მდებარე „ისტორიულად ჩამოყალიბებულ უბანს“ [საკურორტო ადგილს] „გომისმთა“ ეწოდა]. განკარგულება ძალაში 6 აპრილს შევიდა.

იმის შესახებ, რომ მიწის სისტემური რეგისტრაციის 8-თვიანი პროექტი 2020 წლის ზაფხულში დაიწყება და რამდენიმე მთიან რეგიონში განხორციელდება, საქართველოს მთავრობამ 2020 წლის მაისში განაცხადა. მთავრობის ინფორმაციით, მომავალი წლის დასაწყისიდან პროექტი გაფართოვდება და საქართველოს ყველა რეგიონს მოიცავს. საქართველოს მთავრობამ ასევე განაცხადა, რომ მომდევნო 3 წლის განმავლობაში მოქალაქეებისთვის ჯამში 1.2 მილიონი ჰექტარი მიწის სისტემურ რეგისტრაციას გეგმავს.

მიწის სისტემური რეგისტრაციის პროექტის ფარგლებში, საჯარო რეესტრი თავად ახდენს მიწების აზომვას, საკადასტრო ნახაზების მომზადებას, ყველა საჭირო დოკუმენტების მოძიებას, ნახაზების ჩასწორებას და მიწის ნაკვეთის საკუთრებაში დარეგისტრირებას. ეს  ყველაფერი კი მოქალაქეებისთვის არის უფასო.