როდის გაიხსნება ცენტრალური მაგისტრალის სამტრედია-გრიგოლეთის მონაკვეთი

სამტრედია გრიგოლეთის გზის 12-კილომეტრიანი მესამე მონაკვეთი წელს გაიხსნება. ამის შესახებ აღნიშნულია იმ ბანერზე, რომელიც გზის მშენებელმა კომპანიამ – Hunan Road & Bridge Construction Group-მა “ოცნების” მთავრობის ინფრასტრუქტურის ახალ მინისტრს, რევაზ სოხაძეს წარუდგინა. აღნიშნული ბანერი გამოქვეყნდა ინფრასტრუქტურის სამინისტროს Facebook გვერდზე, თუმცა თავად უწყების პრესრელიზში კონკრეტული თარიღი თუ როდის გაიხსნება გზის ეს მონაკვეთი მითითებული არაა.

ბანერის მიხედვით, გზის მშენებლობის დასრულება 2025 წლის 31 აგვისტოდან 30 ნოემბრამდე მოხდება.

გზის ამ მონაკვეთზე 2022 წლის სექტემბრიდან ჩინური სახელმწიფო კორპორაცია Hunan Road & Bridge Construction Group-ი მუშაობს და ის ბიუჯეტიდან 324.6 მილიონ ლარს იღებს. კომპანიას ხელშეკრულების გაფორმების დროს გავრცელებული ინფორმაციით სამუშაოები 2 წლის ვადაში უნდა დაესრულებინა, თუმცა ის საბოლოოდ 2025 წელს გაიხსნება.

აღნიშნული გზა ჯერ კიდევ 2020 წელს წინ გახსნილიყო, რადგანაც პროექტზე თავდაპირველი ხელშეკრულება იტალიურ-ყაზახურ საინჟინრო კომპანია Todini-სთან 2017 წლის ივნისში იყო გაფორმებული, თუმცა უკვე 2018 წლის გაზაფხულზე აშკარა იყო, რომ კომპანია სამუშაოებს ფაქტობრივად არ ასრულებდა და განხორციელებული იყო სამუშაოების მხოლოდ 0.9%. კომპანიასთან კონტრაქტის შეწყვეტის შემდეგ მთავრობამ ახალი ტენდერი გამოაცხადა, ხოლო Todini-სთან ასეულ მილიონიანი საარბიტრაჟო დავა დაიწყო.

აღნიშნულ პერიოდში გზის ღირებულება 138 მილიონ ლარს შეადგენდა, თუმცა განახლებული ტენდერის შედეგად მისი საფასური მკვეთრად გაიზარდა და ის ამჟამად 324.6 მილიონ ლარად შენდება.

გზა გვერდს უვლის შემდეგ დასახლებულ პუნქტებს: ლანჩხუთს, გვიმრალაურს, ჭალას, ქვემო ჩიბათს, ლესას და ნიგვზიანს.