როდის აისახება წამლების ფასზე თურქეთის ბაზრის გახსნა? – გამყრელიძის პროგნოზი

იმპორტზე გადასაწყობად 1-2 თვე დაგვჭირდება, რის შემდეგაც ცვლილებას მოსახლეობაც დაინახავს, – ამის შესახებ გადაცემა Forbes Health-ში, საქართველოს ჯანდაცვის ჯგუფის, GHG-ის გენერალურმა დირექტორმა თურქეთის ბაზრის გახსნის საკითხზე საუბრისას განაცხადა.

როგორც ნიკა გამყრელიძემ აღნიშნა, ორი თვის შემდეგ მოსახლეობა პოზიტიურ ცვლილებას საკუთარ ჯიბეზე იგრძნობს. GHG-ის გენერალურმა დირექტორმა, ასევე მედიკამენტების ფასების მაღალ მარჟებთან დაკავშირებითაც ისაუბრა და აღნიშნა, რომ ამ საკითხზე კრიტიკა მათთვის მორალური წნეხი იყო.

“კონკურენციის სააგენტომ ერთგვარად წერტილი დაუსვა იმ ჰიპოთეზებს, რომ ლოკალური მსხვილი დისტრიბუტორები საქართველოში, განსაკუთრებით დიდ მარჟებზე მუშაობენ. იქ ხაზგასმით წერია, რომ ბაზრის ზრდის ძირითადი ნაწილი წამოსულია ლარის დევალვაციის გამო და საშუალო დარიცხვა ძირითად იმპორტიორებს აქვთ 18-დან 26%-მდე, რაც არის აბსოლუტურად ნორმალური დარიცხვა. ეს საკმაოდ დიდი მიღწევა იყო ჩვენთვისაც, როგორც ამ ბიზნესში მყოფი ოპერატორებისთვისაც. ვინაიდან მუდმივი მორალური წნეხი იყო ჩვენზე, რომ მაღალი მარჟებით ვმუშაობთ მიუხედავად იმისა, რომ ყოველკვარტალურად ვაქვეყნებთ ჩვენს მონაცემებს და ა.შ. ეს დასკვნა საკმაოდ ავტორიტეტულმა მონიტორინგის ინსტიტუტმა (კონკურენციის სააგენტომ) გააკეთა. მიხარია, რომ ბაზარი მეტად ტრანსფარენტული გახდა, შესაბამისად ამის საფუძველზე ეფექტიანი გადაწყვეტილება იქნა მიღებული, რომლის შედეგსაც მალე დავინახავთ. თავისთავად ამას რაღაც დრო დასჭირდება, რომ გადავეწყოთ ნაწილობრივ იმპორტზე. ამისათვის შეიძლება 1-2 თვე დაგვჭირდეს. მაგრამ ვფიქრობთ, ამის შედეგს მალე ვიგრძნობთ და ჩვენი მოსახლეობაც დაინახავს”, – განაცხადა ნიკა გამყრელიძემ.