“ნიუ ჰოსპიტალის” რეანიმატოლოგი ამბობს, რომ გუშინ ვაკის პარკში დენის დარტყმით დაშავებული ბავშვის მდგომარეობა სტაბილურია, თუმცა კვლავ ხელოვნურის სუნთქვის აპარატზე იმყოფება.
“იმყოფება მართვით სუნთქვაზე, საძილე მედიკამენტების მოქმედების ფონზე სძინავს, დინამიკაში მდგომარეობა გაუარესებული არ არის. აღინიშნა ცხელების ეპიზოდი, თუმცა, ახლა ტემპერატურა ნორმის ფარგლებშია. ჩაუტარდა კვლევები, თავის ტვინის რაიმე პათოლოგიური ცვლილებები არ არის. გრძელდება მკურნალობა ინტენსიური თერაპიის განყოფილებაში”, – თქვა რეანიმატოლოგმა.
კიდევ ერთი მოზარდის მდგომარეობა, რომელი იაშვილის კლინიკაში რჩება, სტაბილურია. ბავშვი კონტაქტურია და სავარაუდდო, რამდენიმე დღეში გაწერენ. გუშინ დღის პირველ ნახევარში თბილისში, ვაკის პარკის შადრევანში ჩავარდნილი ბურთის ამოსაღებად ჩასულ 3 ბავშვს დენმა დაარტყა.
თვითმხილველი, რომელიც უშუალოდ შეესწრო ვაკის პარკში მომხდარ უბედურ შემთხვევას, ამბობს, რომ მოზარდების წყლიდან ამოყვანა რთული იყო, რადგან დენი მათ დასახმარებლად ჩასულ კაცსაც არტყამდა.
შინაგან საქმეთა სამინისტრომ გამოძიება დაიწყო სისხლის სამართლის კოდექსის 240-ე მუხლის პირველი ნაწილით (უსაფრთხოების წესების დარღვევა). გამოკითხვები პოლიციის განყოფილებაში მთელი ღამის განმავლობაში მიმდინარეობდა.
Loading ...