როგორ უნდა მოიქცეს ფერმერი თუ ბაღში თხილის ხეები უხმება?

„ფესვედომონა“ ბაქტერიაა, რომელიც თხილის ხეების სწრაფ ხმობას იწვევს და მეთხილე ფერმერებისთვის შედარებით ახალი გამოწვევაა.

თხილის მწარმოებელთა ასოციაციის აღმასრულებელი საბჭოს თავმჯდომარის მერაბ ჭითანავას ინფორმაციით, ამ დროისთვის, ბაქტერია, დაახლოებით, 7-8 ათას ჰექტარზეა გავრცელებული.

მისივე თქმით, “ფესვედომონა“ ბაქტერიის რთულია ფორმაა, რომელიც თხილის ხეების სწრაფ ხმობას იწვევს ივნის-ივლისში.

რა უნდა გააკეთოს ფერმერმა თუ ბაღში თხილის ხეები უხმება? – „არაფერი“ – ასე უპასუხა BMGTV-ის გადაცემა „წერტილში“ ჟურნალისტის კითხვას მერაბ ჭითანავამ და განმარტა, რომ ინფიცირებული ხეების მოჭრამ, ბაღიდან გატანამ და ნიადაგის დამუშავებამ, შეიძლება, ბაქტერიის გავრცელებას უფრო შეუწყოს ხელი.

მერაბ ჭითანავას რეკომენდაციაა, აღნიშნული პრობლემის მქონე ბაღებში ფოთოლცვენის პერიოდის შემდგომი პროფილაქტიკური წამლობა სპილენძის ნარევითა და გოგირდით.

ამასთან, თხილის მწარმოებელთა ასოციაციის აღმასრულებელი საბჭოს თავმჯდომარე აცხადებს, რომ სოფლის მეურნეობის სამინისტროსთან ერთად მიმდინარეობს მუშაობა ტექნიკური პროტოკოლის შემუშავებაზე, თუ როგორ უნდა ებრძოლონ ფერმერები ბაქტერიას.

„იმედი მაქვს, სექტემბრის შუა რიცხვებში ან ბოლოსკენ პროტოკოლს წარმოვადგენთ, როგორ გავუმკლავდეთ ამ პრობლემას“, – თქვა მან.

მერაბ ჭითანავა მიიჩნევს, რომ „ფსევდომონასთან“ ბრძოლა ფერმერების უმრავლესობას საკუთარი ფინანსური რესურსით გაუჭირდება, ამიტომ არ გამორიცხავს, რომ სახელმწიფოს მხარდაჭერა გახდეს საჭირო.

„ჩვენ მოვამზადებთ პროექტს და დანარჩენი უკვე დამოკიდებულია რესურსებზე“, – დასძინა მან.

აღსანიშნავია, რომ უკვე ორი წელია საქართველოს თხილის მწარმოებელთა ასოციაცია, სოფლის მეურნეობის სამეცნიერო კვლევით ცენტრთან ბაქტერია „ფსევდომონას“ მიზეზის იდენტიფიცირებას და პრევენციის გზების პოვნას ცდილობს. ასოციაციის ინფორმაციით, პროცესში იტალიელი და თურქი მეცნიერებიც არიან ჩართულები.