სახელმწიფო სერვისების განვითარების სააგენტოს ვებგვერდზე ვრცლადაა ინფორმაცია გამოქვეყნებული, თუ როგორ ხდება მარტოხელა, ან მრავალშვილიანი მშობლის სტატუსის დადგენა:
მარტოხელა დედა /მარტოხელა მამა არის :
- პირი, რომელსაც ჰყავს 18 წლამდე ასაკის შვილი, თუ ბავშვის დაბადების აქტის ჩანაწერში არ არის შეტანილი ჩანაწერი ბავშვის მეორე მშობლის შესახებ;
- პირი, რომელსაც შვილად ჰყავს აყვანილი 18 წლამდე ასაკის ბავშვი, თუ ბავშვის დაბადების აქტის ჩანაწერში არ არის შეტანილი ჩანაწერი ბავშვის მეორე მშობლის შესახებ;
- პირი, რომლის არასრულწლოვანი შვილის მეორე მშობელი გარდაცვლილია, გამოცხადებულია გარდაცვლილად ან აღიარებულია უგზო-უკვლოდ დაკარგულად;
- პირი, რომლის არასრულწლოვანი შვილის მეორე მშობელს ჩამორთმეული აქვს მშობლის ყველა უფლება და მოვალეობა.
მარტოხელა მშობლის სტატუსის მოსაპოვებლად განცხადება შეიძლება წარადგინოს:
- მარტოხელა მშობლის სტატუსის მაძიებელმა პირმა 16 წლის ასაკიდან, თუ ქორწინების საფუძველზე შეძენილი აქვს ქმედუნარიანობა;
- მარტოხელა მშობლის სტატუსის მაძიებელმა 18 წლამდე ასაკის პირის ერთ-ერთმა კანონიერმა წარმომადგენელმა, გარდა იმ შემთხვევისა, თუ 16–დან 18 წლამდე ასაკის პირს ქორწინების საფუძველზე შეძენილი აქვს ქმედუნარიანობა;
- მხარდაჭერის მიმღებმა მხარდამჭერი პირის თანხმობით, თუ სასამართლო გადაწყვეტილებით სხვა რამ არ არის დადგენილი;
- მინდობილმა პირმა;
- მეურვეობისა და მზრუნველობის ორგანომ, თუ პირი იმყოფება მეურვეობისა და მზრუნველობის ქვეშ.
წარმოსადგენი დოკუმენტები
- პირადობის დამადასტურებელი დოკუმენტი;
- ბავშვის (ბავშვების) დაბადების მოწმობა;
- სტატუსის მაძიებელი პირის დაბადების მოწმობა, თუ სტატუსის მაძიებელი არასრულწლოვანია და განცხადების წარდგენა ხდება კანონიერი წარმომადგენლის მიერ;
- სასამართლოს კანონიერ ძალაში შესული გადაწყვეტილება, თუ სტატუსის მაძიებელი პირი არის მხარდაჭერის მიმღები;
- სასამართლოს კანონიერ ძალაში შესულ გადაწყვეტილება, თუ ბავშვის ერთ-ერთი მშობელი გამოცხადებულია გარდაცვლილად ან აღიარებულია უგზო-უკვლოდ დაკარგულად; ან თუ არასრულწლოვანი ბავშვის ერთ-ერთ მშობელს ჩამორთმეული აქვს მშობლის ყველა უფლება და მოვალეობა;
- ერთ-ერთი მშობლის გარდაცვალების მოწმობა;
- სხვა დოკუმენტები, რომლებიც აუცილებელია სტატუსის დადგენისათვის.
თუ პირი დაბადებულია საქართველოს ტერიტორიის ფარგლებს გარეთ და არ შეუძლია წარმოადგინოს დაბადების მოწმობა, აღნიშნული დოკუმენტის ნაცვლად, შესაძლებელია წარმოდგენილ იქნეს შესაბამისი ქვეყნის უფლებამოსილი ორგანოს მიერ გაცემული დოკუმენტი, რომელიც ადასტურებს პირის ვინაობას, მისი დაბადების ფაქტს, მშობლების ვინაობას და დაბადების აქტის რეგისტრაციის მონაცემებს. დოკუმენტები შესაბამის ორგანოებს უნდა წარედგინოს მატერიალური ფორმით.
მარტოხელა მშობლის სტატუსის შესახებ განცხადება განიხილება და გადაწყვეტილება მიიღება განაცხადის წარდგენიდან 30-ე დღეს. მომსახურება უფასოა.
მრავალშვილიანი მშობელი არის პირი, რომელსაც ჰყავს ოთხი ან მეტი შვილი ან/და ნაშვილები.
მრავალშვილიანი მშობლის სტატუსი ენიჭებათ:
- საქართველოს მოქალაქეს, რომელსაც ჰყავს ოთხი ან მეტი შვილი ან/და ნაშვილები;
- საქართველოში სტატუსის მქონე მოქალაქეობის არმქონე პირს, რომელსაც ჰყავს ოთხი ან მეტი შვილი ან/და ნაშვილები.
სტატუსის დადგენის შესახებ განცხადების წარდგენის უფლება აქვთ:
- სტატუსის მაძიებელ პირს;
- მხარდამჭერს, თუ სასამართლოს გადაწყვეტილებით სხვა რამ არ არის დადგენილი;
- მინდობილ პირს;
- მეურვეობისა და მზრუნველობის ორგანოს, თუ პირი იმყოფება მეურვეობისა და მზრუნველობის ქვეშ.
სტატუსის დადგენის მიზნით პირი შესაბამისი განცხადებით მიმართავს სააგენტოს ტერიტორიულ სამსახურს და წარადგენს შემდეგ დოკუმენტ(ებ)ს:
- პირადობის დამადასტურებელ დოკუმენტს;
- სტატუსის მაძიებლის შვილების/ნაშვილები პირების დაბადების მოწმობებს;
- სასამართლოს კანონიერ ძალაში შესულ გადაწყვეტილებას, თუ სტატუსის მაძიებელი პირი არის მხარდაჭერის მიმღები;
- სხვა ყველა დოკუმენტს, რომლიც აუცილებელია სტატუსის დადგენის ფაქტების უტყუარად დადასტურებისათვის.
თუ სტატუსის მაძიებლის შვილი/ნაშვილები დაბადებულია საქართველოს ტერიტორიის ფარგლებს გარეთ და არ შეუძლია წარმოადგინოს დაბადების მოწმობა, აღნიშნული დოკუმენტის ნაცვლად, შესაძლებელია წარმოდგენილ იქნეს შესაბამისი ქვეყნის უფლებამოსილი ორგანოს მიერ გაცემული დოკუმენტი, რომელიც ადასტურებს პირის ვინაობას, მისი დაბადების ფაქტს, მშობლების ვინაობას და დაბადების აქტის რეგისტრაციის მონაცემებს. დოკუმენტები შესაბამის ორგანოებს უნდა წარედგინოს მატერიალური ფორმით.
მრავალშვილიანი მშობლის სტატუსის შესახებ განცხადება განიხილება და გადაწყვეტილება მიიღება განაცხადის წარდგენიდან 30-ე დღეს.
სტატუსის დადგენა ხორციელდება უფასოდ.
ინფორმაციას ვრცლად შეგიძლიათ, გაეცნოტ სახელმქიფო სერვისების განვითარების სააგენტოს ვებგვერდზე.
Loading ...
