ახალ წლამდე ცოტა დრო რჩება. თუკი სხვადასხვა აქსესუარის, სუფრის გაწყობისთვის ინგრედიენტების მომარაგებას გეგმავთ, შესაძლოა, ეს რჩევები გამოგადგეთ. 2024 წლის მთავარი სიმბოლო მწვანე ხის დრაკონია. ჩინური ჰოროსკოპის მიხედვით, ჰოროსკოპის 12 ნიშნიდან დრაკონი ყველაზე ბრძენ და პატივსაცემ ცხოველად ითვლება. დრაკონს შრომისმოყვარეობა, პატიოსნება და ერთგულება ყველაზე მეტად უყვარს. აფასებს სიფერადესა და სილაღეს. ამიტომაც, სახლის მორთვისა, თუ სუფრის გაფორმების კუთხით, სხვადასხვა დეტალი უნდა გავითვალისწინოთ, თუ გვსურს, რომ წლის მთავარი სიმბოლოს კეთილგანწყობა მოვიპოვოთ.
სასარგებლო რჩევებს ბომონდი გვიზიარებს :
გაფორმება
დრაკონს ყველაზე მეტად მიმზიდველი, ბრჭყვიალა და ხმაურიანი ფერები მოსწონს. წითელი, მწვანე, ოქროსფერი, ნარინჯისფერი, ვერცხლისფერი და იასამნისფერი მისი ფავორიტი ფერებია. ამიტომ, ვიდრე სუფრას გააწყობთ, ჯობს, დაფიქრდეთ, ხელსახოცების, ჭურჭლის, დეკორაციების ფერებზე და ჩამოთვლილ ტონებს მიანიჭოთ უპირატესობა. მაგალითად, ვერცხლისფერი დანა-ჩანგალი იასამნისფერ სუფრაზე ძალიან ლამაზად გამოიყურება, ოქროსფერი კი – წითელ, ან მწვანე სუფრაზე.
გააფორმეთ მაგიდა ნაძვის ხის მცირე ტოტებით, დრაკონის ფორმის გამოსახულებებით, სანთლებით – როგორც ასტროლოგები ამბობენ, წლის მთავარ სიმბოლოს ცეცხლი განსაკუთრებით მოსწონს. ამიტომ, სუფრაზე შეგიძლიათ, როგორც ბუნებრივი, ასევე ხელოვნური სანთლები და განათებებიც განათავსოთ.
რა შეიძლება საახალწლო სუფრისთვის მოვამზადოთ?
საახალწლო სუფრისთვის შეგიძლიათ, გამოიყენოთ:
- ღორის, საქონლის ხორცი
- თევზი
- ყველის დაფა
- ხორცის რულეტი
- სანელებლებით შეზავებული კერძები
- ბრინჯიანი კერძები
- გლინტვეინი
- დესერტები შოკოლადითა და მარწყვით
- თხილეული, ჩირეული და სხვა.
რა არ უნდა იდოს საახალწლო სუფრაზე?
ქათამი – როგორც ასტროლოგები ამბობენ, ეს სიღარიბის სიმბოლოა და შესაძლოა, 2024 წელს ფინანსური პრობლემები შეგექმნათ. ქათმის ხორცის ნაცვლად, შეგიძლიათ, სუფრაზე კურდღლის ხორცი განათავსოთ.
სოკო – როგორც ამბობენ, ის წუხილისა და დარდის სიმბოლოა. ამიტომაც, საახალწლო სუფრაზე ნუ გადააჭარბებთ. შეგიძლიათ, მცირე რაოდენობით სალათებში გამოიყენოთ.
ხახვი – როგორც ასტროლოგები ამბობენ, დრაკონისთვის ის სიმწარესთან, ცრემლთან და წყენასთან ასოცირდება. ამიტომაც, ამ შემთხვევაშიც ნუ გადააჭარბებთ. კერძებში შეურიეთ, თუმცა დომინანტურ გემოდ ნუ გახდით.
თეთრი პილპილი – დრაკონს უფრო ცხარე კერძები უყვარს. თეთრი პილპილი ჩხუბთან და კონფლიქტებთან ასოცირდება, ამიტომ ჯობს, სანელებლად არ გამოიყენოთ.
რამდენიმე საინტერესო რეცეპტი საახალწლო სუფრისთვის:
ფარშირებული კვერცხი – “დრაკონის თვალები”
ინგრედიენტები:
- კვერცხი – 3 ცალი
- მაგარი ყველი – 40 გრ
- ახალი კიტრი – 60 გრ
- ნიორი – 2 კბილი
- მაიონეზი – 3 ჩაის კოვზი
- ზეთისხილი – 2 ცალი
- სალათის ფურცლები – 40 გრამი
- მარილი გემოვნებით
მომზადება:
კვერცხი მაგრად მოახარშეთ, გააგრილეთ, შუაზე გაჭერით და გულისგან ფრთხილად გაათავისუფლეთ ისე, რომ ცილის სტრუქტურა არ დაირღვეს. ყველი გახეხეთ და კვერცხის გულებს შეურიეთ. ნიორი დაჭყლიტეთ, დაამატეთ ყველიან მასას, შემდეგ დაამატეთ მაიონეზი, მარილი და კარგად აურიეთ. მიღებული მასით ამოავსეთ კვერცხი, პატარა ჩაღრმავება გაუკეთეთ და ზეთისხილი მოათავსეთ. კიტრი თხლად დაჭერით და კვერცხს შემოახვიეთ. თეფშზე დააფინეთ სალათის ფურცლები და კვერცხი გადაიტანეთ. თემატური კერძი “დრაკონის თვალები” მზადაა!
კენკრის პუნში
ინგრედიენტები:
- ვისკი – 50 მლ
- მოცვი – 50 გრ
- გაყინული ალუბალი – 50 გრ
- წითელი მოცხარი – 50 გრ
- ლიმონი – 30 გრ
- შაქარი – 1 სუფრის კოვზი
- დარიჩინის ჩხირი – 1 ცალი
- მიხაკი
- წყალი – 200 მლ
- ანისის ვარსკვლავი – 1 ცალი
მომზადება:
მოათავსეთ კენკრა ქვაბში, დაამატეთ მიხაკი, დარიჩინი, ანისის ვარსკვლავი, შაქარი, დაასხით წყალი და 5 წუთის განმავლობაში ადუღეთ. შემდეგ ცეცხლიდან გადმოდგით და გააგრილეთ. ბოლოს დაუმატეთ ვისკი და გადაანაწილეთ ჭიქებში.
სალათი “ჩინური დრაკონი”
ინგრედიენტები:
- ახალი ჭარხალი – 200 გრ
- ღორის სუკი – 400 გრ
- ხახვი – 400 გრ
- სტაფილო – 200 გრ
- მწვანე წიწაკა – 1 ცალი
- ზეითუნის ზეთი – 1 ჩაის კოვზი
- ოხრახუში – 100 გრ
- სოიოს სოუსი – 3 სუფრის კოვზი
- ვაშლის ძმარი – 1 სუფრის კოვზი
- მარილი გემოვნებით
მომზადება:
ჭარხალი და სტაფილო მსხვილ სახეხზე გახეხეთ, დაამატეთ სოიოს სოუსი და აურიეთ. ღორის ხორცი მოხარშეთ და თხელ ზოლებად დაჭერით. შემდეგ კი ცხარე წიწაკა ასევე ძალიან თხელ ზოლებად დაჭერით და ხორცს დაამატეთ. ხახვი ნახევარწრეებად დაჭერით და ზეითუნის ზეთში 3 წუთის განმავლობაში შეწვით. დაჭერით ოხრახუში, შეურიეთ ყველაფერი ერთად, ძმრით შეაზავეთ და აურიეთ. შეგიძლიათ, დააყოვნოთ ნახევარი საათი, ან მაშინვე მიირთვათ.
საახალწლო დესერტი
ინგრედიენტები:
- ორცხობილა – 250 გრ
- მოხარშული შესქელებული რძე – 4 სუფრის კოვზი
- კარაქი – 100 გრ
- კაკაო შაქრის გარეშე – 2 სუფრის კოვზი
- სიმინდის ფანტელები
მომზადება:
ორცხობილა დაფშვენით, შეურიეთ კაკაო, შესქელებული რძე და დარბილებული კარაქი. კარგად აურიეთ და ხელით გირჩის, კონუსისებური ფორმა მიეცით. თეფშზე გადაიტანეთ სიმინდის ფანტელები და გირჩის ფორმები ამოავლეთ და საახალწლო თემატიკის თეფშზე განათავსეთ!
Loading ...