აღმოსავლეთ-დასავლეთის მაგისტრალის რიკოთის ჩუმათელეთი-ხევის გზაზე დარჩენილი 4-კილომეტრიანი 2-ზოლიანი გზა გაიხსნა. ეს იყო უკანასკნელი საგზაო მონაკვეთი, რომელიც ამ დრომდე არ იყო ექსპლოატაციაში შესული.
ამ დრომდე გადაადგილებისთვის გამოიყენებოდა ამ გზის არსებული პარალელური ზოლი, სადაც ორივე მიმართულების ავტომობილი მოძრაობდა. აღნიშნული მონაკვეთი მიმდინარე წლის ზაფხულში გაიხსნა, რის შემდეგაც მეორე ზოლის სამშენებლო სამუშაოები დაიწყო.
დღეს გზის მონაკვეთი პრემიერ-მინისტრმა ირაკლი კობახიძემ და ინფრასტრუქტურის მინისტრმა რევაზ სოხაძემ გახსნეს.
ჩუმათელეთი-ხევის მონაკვეთის სიგრძე 11.7 კილომეტრია და მისი ღირებულება 330 მილიონ ლარს შეადგენს.
ხოლო მთლიანობაში რიკოთის მაგისტრალის მშენებლობა მოიცავს 52 კმ ახალ 4-ზოლიან გზას, 51 გვირაბსა და 97 ხიდს. ამ ეტაპზე ავტოტრანსპორტი უკვე სარგებლობს 48 კმ-იანი ახალი გზით (50 გვირაბითა და 91 ხიდით), რაც მგზავრობის მანძილს 8 კმ-ით ამცირებს და ანახევრებს გადაადგილების დროს.
პროექტის ჯამური ღირებულება შეადგენს დაახლოებით 2.6 მილიარდ ლარს და ის ხორციელდება აზიის განვითარების ბანკის (ADB), ევროპის საინვესტიციო ბანკის (EIB), მსოფლიო ბანკის (WB) სესხებითა და საქართველოს ბიუჯეტის თანადაფინანსებით.
Loading ...