რატომ გვაქვს კოვიდინფიცირების მაღალი დღიური მაჩვენებელი – თამარ გაბუნიას განმარტება

ჯანდაცვის მინისტრის მოადგილე თამარ გაბუნია ქვეყანაში ინფიცირების გაზრდილ მაჩვენებელზე საუბრობს და იმ მიზეზს განმარტავს, რის გამოც ბოლო 24 საათის განმავლობაში საქართველოში კორონავირუსის 3 590 ახალი შემთხვევა დადასტურდა.

მინისტრის მოადგილის განმარტებით, ეს მაჩვენებელი ახალი წლის დღეებში ტესტირების შემცირებული რაოდენობებიდან გამომდინარეობს.

„ბოლო პერიოდში საახალწლო დღეებთან დაკავშირებით ტესტირების რაოდენობა შედარებით ნაკლები იყო, აქედან გამომდინარე ის შემთხვევები, რომლებიც გამოუვლენელი დარჩა, გარკვეულწილად დაგროვდა და დღეს 3 000-ზე მეტი შემთხვევა დაფიქსირდა. თუმცა ბოლო 7 დღის საშუალო მაჩვენებელი 2 000 შემთხვევაა, რაც შედარებით ნაკლებია, ვიდრე წინა კვირებში, მაგრამ მაინც საყურადღებო მაჩვენებელია. ამას კიდევ უფრო საყურადღებოს ხდის ის გარემოება, რომ მოსალოდნელია ომიკრონის შემთხვევების მატება. დღეისთვის 148 ლაბორატორიული შემთხვევაა დადასტურებული. სხვა ქვეყნების გამოცდილება იმაზე მიუთითებს, რომ ომიკრონის გავრცელების შესაძლებლობები უფრო მაღალია, ვიდრე მაგალითად „დელტა“ ვარიანტის შემთხვევაში იყო, თუმცა სხვა შტამებისგან განსხვავებით მას მძიმე კლინიკური მიმდინარეობა არ ახასიათებს. გამომდინარე აქედან კიდევ უფრო საყურადღებოა ვაქცინაციის ტემპის გააქტიურება, პირადი დაცვის საშუალებებისგან და დიდი თავყრილობებისგან თავის არიდება“, – განაცხადა თამარ გაბუნიამ.

მან სამედიცინო სექტორის მზაობაზე ისაუბრა და აღნიშნა, რომ ვაქცინაციის პროგრამაში წახალისების მექანიზმების განხორციელება გრძელდება.

„200-ლარიან წახალისებას ყველა 50 წელს ზემოთ პირი მიიღებს, ვინც 31 იანვრის ჩათვლით აცრას გაიკეთებს. „ომიკრონის“ წინააღმდეგ ვაქცინა კვლავაც იცავს, განსაკუთრებით იცავს ბუსტერული დოზა.

მობილიზებული რჩება კლინიკური სექტორი. დღეისთვის დატვირთვა მაღალი არ არის და საწოლების თითქმის 50% თავისუფალია, აქედან გამომდინარე, თუკი საჭირო გახდება დამატებითი ნაკადების მართვა, ჰოსპიტალურ სექტორს ამის შესაძლებლობა აქვს.

კლინიკური ჯგუფი აქტიურად მუშაობს, შეხვედრები ყოველდღიურად იმართება სამინისტროს ხელმძღვანელობას და კლინიცისტებს შორის, რომ ვნახოთ, დამატებით რა რესურსის მობილიზებაა საჭირო, თუკი „ომიკრონის“ გავრცელებასთან დაკავშირებით იქნება საჭიროება, ესეც მოხერხდეს. განსაკუთრებული აქცენტი კეთდება ახალი მედიკამენტების დანერგვაზე და იმ პროცესების გამართვაზე, რაც ჰოსპიტლებს დღეს დიდი ნაკადების სამართავად სჭირდებათ“, – განმარტა მინისტრის მოადგილემ.