რატომ გაძვირდა ხაჭაპურის მომზადება

2023 წლის აპრილში ერთი სტანდარტული იმერული ხაჭაპურის მომზადების საშუალო ღირებულებამ 5.99 ლარი შეადგინა, რაც 1.4%-ით მეტია 2022 წლის აპრილის მაჩვენებელზე, თუმცა თვიურ ჭრილში, 2023 წლის მარტთან შედარებით, ერთი ხაჭაპურის ღირებულება 8.0%-ით შემცირდა. ამის შესახებ ინფორმაციას „აისეტის“ კვლევითი ინსტიტუტი ავრცელებს.

„წლიურ ჭრილში, აპრილში ფასები გაიზარდა ხაჭაპურის შემდეგ ინგრედიენტებზე: რძე (+14.9%), საფუარი (+14.5%), კარაქი (+11.1%), კვერცხი (+3.7%), ფქვილი (+1.5%). თუმცა ყველის ფასი, რომელიც ხაჭაპურის ერთ-ერთი მთავარი ინგრედიენტია, 2022 წლის აპრილთან შედარებით, უმნიშვნელოდ, 1.6%-ით შემცირდა.

თვიურ ჭრილში კი ინდექსის ღირებულება შემცირდა, რაც მეტწილად ყველის ფასის შემცირებამ განაპირობა, რომელიც წინა თვესთან შედარებით 11.6%-ით გაიაფდა. წინა თვესთან შედარებით ხაჭაპურის დანარჩენი ინგრედიენტების ფასებიც შემცირდა: კვერცხი (-4.8%), კარაქი (-2.0%), რძე (-1.7%), ფქვილი (-0.7%).

ქალაქების მონაცემებს თუ შევხედავთ, დავინახავთ, რომ თვიურ ჭრილში (2023 წლის მარტთან შედარებით) ინდექსი ყველაზე მეტად ქუთაისში შემცირდა (-14.3%). როგორც მოსალოდნელი იყო, ეს შემცირება დანარჩენ ქალაქებსაც გადაეცა: თბილისში 13.3%-ით შემცირდა, თელავში – 5.6%-ით. გამონაკლისი იყო ბათუმი, სადაც მარტთან შედარებით აპრილში ინდექსი 3%-ით გაიზარდა. მიზეზი შეიძლება სააღდგომოდ ტურისტების შემოდინება იყოს, რამაც სურსათზე მოთხოვნა გაზარდა,“- ნათქვამია „აისეტის“ ინფორმაციაში.