რატომ არ აქტიურობენ მოქალაქეები რეგიონებში ასაცრელად? – გამყრელიძის პასუხი

დაავადებათა კონტროლის ეროვნული ცენტრის ხელმძღვანელ ამირან გამყრელიძის განცხადებით, ვაქცინაციის პროცესში რეგიონებში არსებულ პასიურობას რამდენიმე მიზეზი აქვს.

„თითქმის ყველა რეგიონში ვიყავი, ახლა მეორე წრეზე დადის პაატა იმნაძე, თუმცა ეს არ არის საკმარისი, მაგალითად მომყავს ციფრები. ბოლო კვლევებით, მოსახლეობის 49% თანახმა იყო აცრებზე, დაახლოებით 20% ყოყმანობდა. ამ 49%-ს ვეუბნებოდით, რომ აქვთ კომფორტი, რომ მივიდეს და აიცრას. დღევანდელი დღით 333 ბრიგადა ცრის ქვეყანაში. ეს არ არის ცოტა.

იმას, თუ რატომ არ მოდის ხალხი ასაცრელად, ბევრი მიზეზი აქვს – ბევრ ადამიანს ჯერჯერობით ჰგონია, რომ კორონავირუსი საერთოდ არ არსებობს, ბევრი ფიქრობს, რომ გადაიტანს და ექნება იმუნიტეტი. არ უყურებენ იმას, რომ დღეს 26 ადამიანი გარდაიცვალა ქვეყანაში. ეს საშინელებაა. ყველა უნდა ავიცრათ. ადრე ამბობდნენ, ვაქცინა არ არისო, ახლა ხომ არის?“, – განაცხადა ამირან გამყრელიძემ.

აღნიშნულ კითხვაზე საპასუხოდ ჯანდაცვის მინისტრის მოადგილე თამარ გაბუნიამ განაცხადა, რომ რეგიონებში ვაქცინაციის მხრივ აქტიურობა არ არის, მიუხედავად იმისა, რომ სამედიცინო დაწესებულებები მზადაა, მოქალაქეები ასაცრელად მიიღოს.

„თუ ეს პროცესი არ გააქტიურდა, სიტუაციიდან გამოსვლა ძალიან გართულდება“, – განაცხადა გაბუნიამ.