ცოტა ხნის წინ საქართველოში ტრიქინელოზის შემთხვევა დაფიქსირდა. სურსათის ეროვნული სააგენტოს ცნობით, დაავადებული პაციენტი ამბობს, რომ ღორის ხორცი ოზურგეთში მიიღო. “გურიაTV” დაუკავშირდა სურსათის ეროვნული სააგენტოს გურიის რეგიონის სამმართველოს ხელმძღვანელს. როგორც მანანა ერქომაიშვილი ჩვენთან საუბრისას ამბობს, დაავადების წყარო დაუდგენელია, რადგან პაციენტი ვერ აკონკრეტებს, კონკრეტულად სად შეიძინა ან მიირთვა ღორის ხორცი. “ეს ადამიანი ამჟამად თბილისში მკურნალობს. მის დასნებოვნებასთან დაკავშირებით ვითარება ბუნდოვანია, რადგან მას უჭირს გახსენება, კონკრეტულად სად მიიღო ღორის ხორცი. აქვს ვერსია, რომ მის ძმასთან მიირთვა, ასევე ეჭვობს, წინასაახალწლო პერიოდზე, როცა ქალაქ ოზურგეთში, ქუჩაში კუპატი იყიდა.შესაბამისად, დაინფიცირების წყაროს მიკვლევადობა შეუძლებელია. შეგვიძლია ვთქვათ, რომ აღნიშნული ღორის ხორცის ყიდვა არ უკავშირდება სარეალიზაციო ობიექტს. შესაძლოა იყოს, სახლში დაკლული ღორის ხორცის მიზეზით. თუ კიდევ ვინმეს გამოუვლინდა ტრიქინელოზი, მაშინ წყაროს დადგენა უფრო შესაძლებელი გახდება, მაგრამ იმედია მეორე შემთხვევა არ გვექნება”- აღნიშნა მანანა ერქომაიშვილმა. როგორც მან განაცხადა, ხსენებული დაავადება არ არის ადამიანისგან ადამიანზე გადამდები. ვრცელდება მხოლოდ ღორის ხორცით. დაავადების დროული აღმოჩენა აადვილებს განკურნებას, თუმცა ტრიქინელოზი გარკვეულ კვალს მაინც ტოვებს ორგანიზმში, სახსრების ტკივილის და სხვა სიმპტომების სახით.
Loading ...
