დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, 18 წელს ზემოთ მოქალაქეებისთვის ჩინური „სინოფარმის“ ვაქცინაზე რეგისტრაცია დღეს დაიწყო და ხვალ გახდება ცნობილი, დაახლოებით რამდენი ადგილია დაჯავშნილი.
როგორც მან „ინტერპრესნიუსს“ განაცხადა, წინასწარი მონაცემებით, ჯერჯერობით რეგიონებში რეგისტრაციის თვალსაზრისით ინტენსიური ჩაწერა არ არის არ არის.
„დღეს დაიწყო „სინოფარმის“ ვაქცინაზე რეგისტრაციაზე. ვნახოთ, ხვალ გავანაწილებთ, რამდენი ადგილი დაიჯავშნა თბილისში და იმისდა მიხედვით მივიღებთ გადაწყვეტილებას. როგორც მეუბნებიან, ჯერჯერობით, რეგიონებში ისეთი ინტენსიური ჩაწერა არ არის“, – განაცხადა გამყრელიძემ.
მისი განმარტებით, მაისში, ივნისში და ივლისში საქართველოში ვაქცინებზე მარაგები თანდათან სერიოზულად შეივსება.
როგორც გამყრელიძემ აღნიშნა, ვაქცინაციასთან დაკავშირებით მოსახლეობის აქტივობა გაზრდილია და ამ თვალსაზრისით საზოგადოების მეტი ინფორმირებულობაა საჭირო. მისივე განმარტებით, სწორედ ვაქცინაციამ უნდა დაასრულოს კოვიდ პანდემია.
„ქვეყანაში ეპიდსიტუაცია გართულებულია, მოგეხსენებათ, ყოველღიური შემთხვევები ათასზე მეტია, რაც ძალიან საყურადღებო და საგანგაშოა. ამიტომ არის აუცილებელი განსაკუთრებული სიფრთხილე, რეკომენდაციებისა და რეგულაციების დაცვა და მეორე მხრივ, ვაქცინაციის გააქტიურება, რომ როგორმე შედარებით ნაკლები დაზიანებით გავიაროთ მაისის თვე“, – განაცხადა გამყრელიძემ.
მის თქმით, ქვეყანაში პირბადის ტარების მაჩვენებელი 80%-მდეა გაზრდილი.
„კიდევ მეტია საჭირო, 95%-მდე რომ ავიდეთ პირბადის ტარების მაჩვენებლის თვალსაზრისით, კიდევ მეტი შედეგი გვექნება, უფრო მეტად შევაკავებთ ქვეყანაში ეპიდემიის განვითარებას“,-განაცხადა გამყრელიძემ.
რაც შეეხება მოახლოებულ აღდგომის დღესასწაულს, ამირან გამყრელიძე კიდევ ერთხელ მოუწოდებს მოსახლეობას, რომ დაწესებული რეგულაციები დაიცვან.
„აღდგომის დღესასწაულების პერიოდში აუცილებლად უნდა იყოს დაცული დისტანცია, პირბადის ტარება ტაძრების შიგნით და გარეთაც. რაც მთავარია, დისტანციიის დაცვა აუცილებელია“,- განაცხადა გამყრელიძემ.
ცნობისთვის, იმუნიზაციის საბჭოს სხდომის დასრულების შემდეგ ცნობილი გახდა, რომ 18 წელს ზემოთ ასაკის მოქალაქეებისთვის ჩინური ვაქცინით, “სინოფარმით” აცრაზე რეგისტრაციის პორტალი 27 აპრილიდან გაიხსნა.