რამდენი 10-წელზე მეტი წლოვანების ავტომობილია რეგისტრირებული საქართველოში

მთავრობა 6 წელზე მეტი წლოვანების ავტომობილების შემოყვანაზე აკრძალვის დაწესებას გეგმავს. ცვლილებების ამოქმედება 1-ელი აპრილიდან არის დაგეგმილი.

როგორც პრემიერ-მინისტრმა ირაკლი კობახიძემ დღევანდელ მთავრობის სხდომაზე განაცხადა, საკანონმდებლო პაკეტი უკვე შემუშავებულია, პარლამენტსაც უკვე წარედგინა. მანვე განმარტა, რომ ქვეყანაში რეგისტრირებული ავტომობილების რაოდენობამ 2 მილიონს გადააჭარბა, რაც მიუთითებს იმაზე, რომ „მნიშვნელოვანი ზომების მიღებაა საჭირო“.

დღესვე გარემოს დაცვისა და სოფლის მეურნეობის სამინისტრომ განაცხადა, რომ გამონაკლისი გავრცელდება იმ M1 კატეგორიის ავტომობილებზე, რომელთა ტრანსპორტირება დაწყებულია 1-ელ აპრილამდე ან რომელიც უკვე შემოყვანილია საქართველოს საბაჟო ტერიტორიაზე – ასეთი ავტომობილების პირველადი რეგისტრაცია არსებული პირობების შესაბამისად 1-ელ აპრილამდე უნდა განხორციელდეს.

„ბიზნესპრესნიუსი“ დაინტერესდა, საქართველოში რეგისტრირებული მსუბუქი ავტომობილების წლოვანებით.

სტატისტიკის ეროვნული სამსახურის მონაცემებით, ბოლო მდგომარეობით საქართველოში რეგისტრირებული ავტომობილების რაოდენობა 1.914 მილიონს შეადგენს, ხოლო მომსახურების სააგენტოს ცნობით, რეგისტრირებული ავტომობილების რაოდენობა 2.015 მილიონს აჭარბებს.

წლოვანების შესახებ სტატისტიკას „საქსტატი“ აწარმოებს, თუმცა კონკრეტულად 6-წლიან ავტომობილებზე ინფორმაცია არ არის ხელმისაწვდომი. აქვე შეგახსენებთ, რომ ქვეყანაში ამ დროისთვის 10 წელზე მეტი წლოვანების ავტომობილების შემოყვანა აკრძალულია.

რაც შეეხება რეგისტრირებული ავტომობილების წლოვანებას, „საქსტატის“ მონაცემები აჩვენებს, რომ ქვეყანაში ავტომობილების 80.5% 10 წელზე მეტი ასაკისაა. ამასთანავე, 5-დან 10 წლამდე ასაკის ავტომობილების წილი მთლიან რეგისტრაციებში 13.8%-ს შეადგენდა, 0-დან 5 წლამდე წლოვანების – 5.3%-ს. აღსანიშნავია, რომ დაუდგენელია ავტომობილების 0.4%-ის წლოვანება.

უფრო კონკრეტულად, რეგისტრირებული ავტომობილების რაოდენობა წლოვანების მიხედვით ასე გამოყურება:

• 10-წელზე მეტი წლოვანების – 1 541 196 ერთეული;
• 5-დან 10-წლამდე – 265 041 ერთეული;
• 0-დან 5 წლამდე – 101 330 ერთეული;
• დაუდგენელი – 7 341 ერთეული.

ავტორის შენიშვნა: უცნობია, რეგისტრირებული ავტომობილებიდან რამდენი გადაადგილდება ქვეყანაში.

მერი ტაბატაძე

www.bpn.ge