რამდენ ხანს დაგვიცავს Covid 19-ის საწინააღმდეგო ვაქცინა? – ამ დროისთვის, ამ შეკითხვაზე დაზუსტებული პასუხი ექსპერტებს არ აქვთ. ამის დასადგენად სპეციალისტები ვაქცინირებულ ადამიანებს იკვლევენ. კვლევის საგანია ისიც, თუ რამდენად ეფექტიანია ვაქცინები კოვიდ 19-ის ახალი ვარიანტების მიმართ, რაც ასევე აცრის საჭირო რაოდენობას განსაზღვრავს, რამდენად ხშირი შეიძლება იყოს იმუნიზაცია.
Pfizer-ის მიმდინარე კვლევა აჩვენებს, რომ ამ მწარმოებლის ორი დოზა ვაქცინა ძალიან ეფექტურია მინიმუმ ექვსი თვის განმავლობაში, სავარაუდოდ უფრო მეტ ხანსაც კი.
Moderna-ს ვაქცინით აცრილ ადამიანებს კი მეორე დოზის მიღებიდან ექვსი თვის შემდეგ ვირუსთან მებრძოლი ანტისხეულები კვლავ ჰქონდათ.
თუმცა, ცნობილია ისიც, რომ ანტისხეულები ორგანიზმის იმუნიტეტზე სრულ ისტორიას ვერ ყვება. ვირუსის მსგავსი თავდამსხმელების წინააღმდეგ, იმუნურ სისტემას დაცვის კიდევ ერთი ხაზი აქვს – B და T უჯრედები, რომელთაგან ბევრი ანტისხეულების გაქრობის შემდეგაც შეიძლება დარჩეს. თუ ისინი ნაცნობ ვირუსსს კვლავ შეხვდებიან, ამ უკვე გამოცდილმა უჯრედებმა მის წინააღმდეგ მოქმედება შესაძლოა სწრაფად დაიწყონ.
ამ ეტაპზე, სპეციალისტები ამბობენ, რომ კოვიდ 19-ზე აცრამ დაავადების სრულად აღკვეთა რომც ვერ შეძლოს, მას შეამსუბუქებს მაინც.
“მიუხედავად იმისა, რომ ამჟამინდელი კოვიდ 19-ის ვაქცინები დაცვას 6 თვიდან დაახლოებით ერთ წლამდე უზრუნველყოფს, არც ისაა გამორიცხული, რომ მათ ორგანიზმი კორონავირუსის წინააღმდეგ მთელი ცხოვრება დაიცვან, ისევე როგორც წითელას ვაქცინამ”, – ამბობს მერილენდის უნივერსიტეტის ვაქცინების ექსპერტი, კეთლინ ნეუზილი.
მესამე დოზის საჭიროება კი მთელ მსოფლიოში მიმდინარე ვაქცინაციის კამპანიის წარმატებულობაზეცაა დამოკიდებული. თუ ვაქცინაციით ვირუსის შემდგომი გადაცემა-გავრცელება შეიზღუდა, კორონავირუსის ახალი ვარიაციების და მუტაციების რაოდენობაც შემცირდება.
mtavari.tv
Loading ...
