ოზურგეთის მუნიციპალიტეტის საკრებულოს სხდომა ხმაურითა და დაპირისპირებით დაიწყო. კონფლიქტი უმრავლესობასა და უმცირესობას შორის სტიქიით დაზარალებული მოსახლეობის დახმარების საკითხს მოჰყვა, რასთან დაკავშირებითაც სიტყვით გამოსვლა ნაციონალური მოძრაობის წევრმა თათია ნიკოლაშვილმა სცადა, მაგრამ უმრავლესობის დეპუტატმა ქეთევენ ხომერიკმა მას ამის საშუალება არ მისცა. კონფლიქტში ჩაერთნენ საკრებულოს წევრები ორივე მხრიდან. ოპოზიციამ ხელისუფლება მოსახლეობის პრობლემების უგულვებელყოფაში დაადანაშაულა. ქართულმა ოცნებამ კი ნაციონალურ მოძრობას ბრალი პროვოკაციასა და დესტრუქციაში დასდო. სხდომაზე კიდევ ერთი საკამათო საკითხი გახდა საკრებულო თავმჯდომარის განცხადება. დავით დარჩიამ განაცხადა, რომ ქვემო ნატანების სკოლის შენობის ავარიული მდგომარეობის შესახებ ყველა საქმის კურსში მანამდე იყო, სანამ შენობაში ჭერი ცამოინგრეოდა და ადამიანი დაშავდებოდა. ამ განცხადებას რეაქცია მოჰყვა ოპოზიციის მხრიდან, თუმცა დარჩიას კომენტარი მედიასთან აღარ გაუკეთებია. შესაბამისად, ჩოჩქოლისა და ხმაურის გამო სხდომის გაგრძელება ვერ მოხერხდა. თავმჯდომარემ ნახევარსაათიანი შესვენება გამოაცხადა.
Loading ...
