რამ გამოიწვია თხილის ფასის დაცემა – გურიაში მყოფი სოფლის მეურნეობის მინისტრის და ფერმერების შეფასებები

დღეს გურიაში გარემოს დაცვისა და სოფლის მეურნეობის მინისტრი ოთარ შამუგია იმყოფებოდა. მინისტრი ლანჩხუთსა და ჩოხატაურში დღეს მეთხილე ფერმერებს შეხვდა. შამუგია ჯერ ლანჩხუთის მუნიციპალიტეტის სოფელ ქვემო აკეთში მოქმედ თანამედროვე სტანდარტებით აღჭურვილ თხილის შემნახველ საწარმოს ეწვია, სადაც ერთდროულად 1,000 ტონამდე თხილის შენახვაა შესაძლებელი. კომპანია სოფლის განვითარების სააგენტოს „სასოფლო-სამეურნეო პროდუქციის გადამმუშავებელი და შემნახველი საწარმოების თანადაფინანსების“ პროექტის ბენეფიციარია. მოგვიანებით ხელისუფლების წარმომადგენლები ჩოხატაურის მუნიციპალიტეტის, სოფელ გუთურში, ფერმერის ლევან კაპანაძის პლანტაციაში თხილის კრეფის პროცესს დაესწრნენ. მეთხილე ფერმერებთან შეხვედრისას გამოიკვეთა პრობლემები, რაც პირველ რიგში თხილის ხარისხსა და დაბალ ფასს უკავშირდება. როგორც მინისტრმა აღნიშნა, თხილის დაბალი სარეალიზაციო ფასი მოსავლის ხარისხით არის განპირობებული. საბაზრო ეკონომიკის პირობებში კი ფასის რეგულირება კი სახელმწიფოს ფუნქციებს სცდება. შეხვედრაზე მყოფმა ფერმერებმა აღნიშნეს, რომ დაბალი ხარისხი, როგორც წესი, თხილის შეწამვლის ვადებისა და წესების დარღვევით არის გამოწვეული. მათ, ვინც თხილს 5–6–ჯერ უწამლეს, წელს ხარისხიანი თხილი აქვთ – აღნიშნეს ფერმერებმა.