რა იცვლება კანონში კანაფისა და მარიხუანის შესახებ

“ქართული ოცნების” წარმომადგენელმა, მამუკა მდინარაძემ ბრიფინგზე განაცხადა, რომ ანტინარკოტიკული რეფორმა შემუშავდა და საქართველოში ნარკოპოლიტიკა გამკაცრდება, რაც მარიხუანის შემთხვევაში რეალიზაციას შეეხება, ხოლო უბრალოდ ჩუქების შემთხვევაში იგივე სასჯელი დარჩება, რაც აქამდე იყო გათვალისწინებული.

“მარიხუანას ეხება გამკაცრება გაყიდვის მიმართულებით და მე შემიძლია გითხრათ, რომ გასაღებად (იურისტებისათვის ეს ნაცნობი ტერმინია და არაიურისტებისთვისაც) ითვლებოდა ყველანაირი სახის გადაცემა აქამდე. […] ყველა შემთხვევაში რეალიზაცია და გარკვეული თანხის მიღება – გასაღებაა ზოგადი… რაც იმას ნიშნავს, რომ ვთქვათ, როცა ნარკოტიკი ერთმა ადამიანმა მეორე ადამიანს გადასცა, უბრალოდ აჩუქა – არის ხოლმე შემთხვევები, როცა მეგობრები ერთმანეთს გაუყოფენ ნარკოტიკს და ა.შ. ესეც გასაღებაა და რჩება (საკმაოდ მძიმე სასჯელი იყო ამაზე და რჩება ეს მძიმე სასჯელი), მაგრამ თუკი პირს დაუდასტურდება, რომ რეალიზებას ახდენს, ანუ ყიდის ნარკოტიკს, აქ სასჯელები კიდევ უფრო, არსებული მკაცრისგან გასხვავებით, კიდევ უფრო მკაცრდება” – თქვა მდინარაძემ.

მდინარაძემ ბრიფინგზე ასევე განაცხადა, რომ  “ორგანიზებული დანაშაულისა და რეკეტის შესახებ” საქართველოს კანონის პროექტით ნარკოვაჭრობისა და ნარკომოვაჭრის ცნება განისაზღვრება და “მოწესრიგდება მათთან დაკავშირებული ცალკეული საკითხები. კერძოდ, განისაზღვრება, ვინ შეიძლება იყოს ნარკომოვაჭრის ოჯახის წევრი, ახლო ნათესავი და დაკავშირებული პირი. ამასთანავე, დადგინდება, თუ რა ჩაითვლება ნარკომოვაჭრის ქონებად.

დაიხვეწება საკანონმდებლო ჩარჩო, რითაც შესაძლებელი გახდება ნარკორეალიზატორისთვის ან ნარკოტიკების გავრცელებაში ხელშემწყობი პირისთვის მის საკუთრებაში არსებული უძრავ-მოძრავი ქონების ჩამორთმევა და სახელმწიფოსთვის გადაცემა.”