მიუხედავად იმისა, რომ წლებია საქართველოში რძის პროდუქტების ეტიკეტირებასა და წარმოებაზე რეგულაციები და მონიტორინგი მკაცრდება, გამოწვევები მაინც არსებობს. ამას ადასტურებს ყველის უვნებლობასთან ჩატარებული ბოლო კვლევაც, რომელიც ენპარდ-ის (ENDPARD) პროექტის ფარგლებში მომზადდა და შედეგები სურსათის ეროვნულ სააგენტოსთან გადაიგზავნა.
კვლევის შედეგები გამოქვეყნდა „საქართველოს სტრატეგიული კვლევებისა და განვითარების ცენტრის“ ვებგვერდზეც – Momxmarebeli.ge. აღნიშნული მონაცემების თანახმად, ყველის 43 ნიმუშიდან 12-ში დარღვევები აღმოჩნდა. მკვლევრებმა საქართველოს სხვადასხვა მუნიციპალიტეტში აიღეს ეტიკეტირებული და არაეტიკეტირებული ყველის ნიმუშები და შეამოწმეს შემდეგ სანიტარულ მაჩვენებელზე: კოლიფორმული ბაქტერიები, სალმონელა და (კოაგულაზა დადებითი) სტაფილოკოკი.
სამივე სახის ბაქტერიით დაბინძურებული პროდუქტების მოხმარების შემთხვევაში შეიძლება, ადამიანის ორგანიზმს ზიანი მიადგეს. აღნიშნული ბაქტერიები უმეტესად არაეტიკეტირებულ ყველში აღმოჩნდა. როგორც წესი, მას სახლის პირობებში, რიგ შემთხვევებში, აუცილებელი სანიტარული ნორმების დაცვისა და რძის ხარისხის გადამოწმების გარეშე ამზადებენ.
დარღვევები, კერძოდ კოლი-ფორმები და სტაფილოკოკი აღმოჩნდა გურჯაანის, სიღნაღის, ვანის, ბაღდათის, ზესტაფონისა და ამბროლაურის აგრარულ ბაზრებსა და ინდივიდუალური მეწარმეებისგან შეძენილ პროდუქციაში. ასევე, კოლი-ფორმები აღმოაჩინეს შპს „შავნაბადას“ წარმოების იმერულ ყველში სახელწოდებით – „დიდგორი“.
დარღვევები არ აღმოჩნდა „სანებოს“ წარმოების არცერთი სახეობის ყველში; ქარხნულ ყველში „ხიზა“, იმერულ ყველში „ექსტრა“; შპს „წიფორა-სამცხეს“ იმერულ ყველში; „რჩეულის“, „ცეზარის“, „შირაქის“, „ნინოწმინდის (ბოგდანოვკის)“ პროდუქციაში და ასევე, საქართველოს სხვადასხვა რეგიონში ინდივიდუალური მეწარმეებისაგან შეძენილი ყველის ნაწილში.
Loading ...
