რა გაძვირდა საქართველოში სექტემბერში ყველაზე მეტად

სტატისტიკის ეროვნული სამსახურის მონაცემებით, სექტემბერში წლიური ინფლაციის ფორმირებაზე ძირითადი გავლენა იქონია ფასების ცვლილებამ სურსათსა და უალკოჰოლო სასმელებზე.

ჯგუფში ფასები გაიზარდა 11.9 პროცენტით, რაც წლიურ ინფლაციაზე 3.89 პროცენტული პუნქტით აისახა.

ფასები 25.0 პროცენტით მომატებულია ხილსა და ყურძენზე, ბოსტნეული და ბაღჩეული 19.5 პროცენტით გაძვირდა, ზეთი და ცხიმი – 16.4 პროცენტით, შაქარი, ჯემი და სხვა ტკბილეული – 15.1 პროცენტით.

ყავა, ჩაი და კაკაო 12.8 პროცენტითაა გაძვირებული, თევზეული – 11.3 პროცენტით. რძეზე, ყველსა და კვერცხზე ფასებმა 11.3 პროცენტით მოიმატა, პურსა და პურპროდუქტებზე – 10.2 პროცენტით. მინერალური და წყაროს წყალი, უალკოჰოლო სასმელები და ნატურალური წვენები 8.7 პროცენტით გაძვირდა, ხოლო ხორცი და ხორცის პროდუქტები 4.1 პროცენტით.

„ჯანმრთელობის დაცვის ჯგუფში ფასები მომატებულია 9.0 პროცენტით, რაც წლიურ ინფლაციაზე 0.76 პროცენტული პუნქტით აისახა. ფასები 9.4 პროცენტით გაიზარდა საავადმყოფოების მომსახურების ქვეჯგუფზე, 9.2 პროცენტით ამბულატორიული სამედიცინო მომსახურების ქვეჯგუფზე, ხოლო 8.1 პროცენტით სამედიცინო პროდუქციის, აპარატურის და მოწყობილობის ქვეჯგუფებზე.

ალკოჰოლური სასმელები, თამბაქო – აღნიშნულ ჯგუფში ფასები გაიზარდა 4.1 პროცენტით. შესაბამისად, ჯგუფის წვლილმა წლიურ ინდექსში 0.26 პროცენტული პუნქტი შეადგინა. ფასები გაიზარდა როგორც თამბაქოს ნაწარმზე (6.0 პროცენტი), ისე ალკოჰოლურ სასმელებზე (2.4 პროცენტი);

ტრანსპორტის ჯგუფში ფასები შემცირდა 2.1 პროცენტით, რაც წლიურ ინფლაციაზე -0.26 პროცენტული პუნქტით აისახა. ფასები შემცირდა პირადი სატრანსპორტო საშუალებების ექსპლუატაციაზე (-3.2 პროცენტი) და სატრანსპორტო მომსახურებაზე (-0.9 პროცენტი). ამასთან, ფასები გაზრდილია სატრანსპორტო საშუალებების შეძენაზე (0.7 პროცენტი)“, – აღნიშნულია საქსტატის მიერ გამოქვეყნებულ ანგარიშში.