პუტინის ისტორიული შეცდომის მიუხედავად, რუსეთი არ უნდა დავამციროთ – მაკრონი

საფრანგეთის პრეზიდენტის ემანუელ მაკრონის თქმით, სასიცოცხლოდ მნიშვნელოვანია, რომ რუსეთი დამცირებული არ იყოს, რათა უკრაინაში ომის დასრულების შემდეგ დიპლომატიური გადაწყვეტის გზები მოიძებნოს.

როგორც მაკრონმა აღნიშნა, კონფლიქტის დასასრულებლად პარიზი მედიატორის როლს შეასრულებს.

“ჩვენ არ უნდა დავამციროთ რუსეთი, რადგან, როცა ომი შეწყდება, შევძლოთ ავაშენოთ ხიდი დიპლომატიით. მე დარწმუნებული ვარ, რომ საფრანგეთის როლია, შეასრულოს მედიატორის ფუნქცია”, – თქვა მან.

უკრაინაში შეჭრის შემდეგ, მაკრონმა არაერთხელ სცადა შეენარჩუნებინა დიალოგი რუსეთის პრეზიდენტ ვლადიმერ პუტინთან: “მე ვფიქრობ და მე ეს მასაც ვუთხარი, რომ ის ისტორიულ და ფუნდამენტურ შეცდომას უშვებს თავისი ხალხის, თავისი თავისა და ისტორიის წინაშე”, – თქვა მაკრონმა.

საფრანგეთის ლიდერის პოზიცია არაერთხელ გააკრიტიკეს ბალტიისპირა პარტნიორებმა, რადგან ისინი თვლიან, რომ მაკრონის მცდელობა ძირს უთხრის პუტინზე ზეწოლას, რომელმაც ის უნდა აიძულოს, მოლაპარაკებების მაგიდასთან დაჯდეს.

ომის განმავლობაში საფრანგეთი უკრაინას ფინანსურ და სამხედრო დახმარებას უწევს, თუმცა სხვა ევროპელი ლიდერების მსგავსად, მაკრონი კიევში სიმბოლური მხარდაჭერის გამოსახატად ამ დრომდე არ ჩასულა.

ეს პირველი შემთხვევა არ არის, როცა მაკრონი ამბობს, რომ “რუსეთი არ უნდა იყოს დამცირებული”.