“პუტინის ბრძანება შევასრულეთ” – სოხუმში სანქტ-პეტერბურგიდან პირველი რეისი შესრულდა

სანქტ-პეტერბურგიდან სოხუმის აეროპორტში პირველი რეისი შესრულდა. ინფორმაციას სანქტ-პეტერბურგის გუბერნატორის პრესსამსახური ავრცელებს.

კერძოდ, 14 აგვისტოს „პულკოვოს” აეროპორტიდან სოხუმში სანქცირებული ავიაკომპანია iFly-ის Airbus A330-ის თვითმფრინავი დაეშვა. მანამდე სანქტ-პეტერბურგიდან სოხუმში ფრენა მხოლოდ ტრანსფერით იყო შესაძლებელი.

მომდევნო რეისი 20 აგვისტოს არის დაგეგმილი, რის შემდეგაც ყოველ ოთხშაბათსა და კვირას შესრულდება.

რუსული ტუროპერატორები რეისებზე ტურებს ყიდიან.

14 აგვისტოს რეისზე ბილეთი, დაახლოებით, 20 ათასი რუბლი (250 დოლარი) ღირდა, ხოლო 20 აგვისტოს ფრენაზე ფასი 30 ათას რუბლს (375 დოლარს) შეადგენს.

„ეს მნიშვნელოვანი მოვლენაა სანქტ-პეტერბურგისა და აფხაზეთის მცხოვრებლებისთვის. ჩვენ დიდი ხანია, ამის მიღწევას ვცდილობდით და ერთად მივაღწიეთ. დღეს შეგვიძლია პასუხისმგებლობით განვაცხადოთ, რომ შევასრულეთ რუსეთის პრეზიდენტის ბრძანება სოხუმთან პირდაპირი საჰაერო მიმოსვლის აღდგენის შესახებ,“ – აცხადებს სანქტ-პეტერბურგის გუბერნატორი, ალექსანდრ ბეგლოვი.

გააგრძელეთ კითხვა: