პუტინი აცხადებს, რომ კორონავირუსის საწინააღმდეგო “რევაქცინაცია” ჩაიტარა

რუსეთის პრეზიდენტმა ვლადიმირ პუტინმა განაცხადა, რომ ხელახლა ჩაიტარა კორონავირუსის საწინააღმდეგო ვაქცინაცია რუსული ვაქცინით „სპუტინიკ ლაითით“.

რუსული სააგენტო ტასი-ს თანახმად, პუტინმა ამის შესახებ ისაუბრა გამალეის სახელობის მიკრობიოლოგიისა და ეპიდემიოლოგიის ეროვნული კვლევით ცენტრის დირექტორის მოადგილე, დენის ლოგუნოვთან შეხვედრის დროს.
„დღეს თქვენი და თქვენი კოლეგების რეკომენდაციით მე კიდევ ერთი აცრა ჩავიტარე – „სპუტნიკ ლაითით. ამას უკვე რევაქცინაცია ჰქვია“, – თქვა პუტინმა და დასძინა, რომ განმეორებითი აცრის შემდეგ თავს კარგად გრძნობს.
კორონავირუსის საწინააღმდეგო ვაქცინით პირველი აცრა ვლადიმირ პუტინმა 23 მარტს ჩაიტარა, მაგრამ უცნობია, თუ რომელი ვაქცინით აიცრა რუსეთის პრეზიდენტი.
განსხვავებით სხვა ქვეყნების ლიდერებისგან, პუტინმა უარი თქვა ვიდეოკამერის წინ აცრაზე. რუსეთის მოქალაქეებს მოუწევთ, რომ „სიტყვაზე გვენდონო“, – განაცხადა პუტინის აცრის შემდეგ მისმა პრესმდივანმა, დმიტრი პესკოვმა.

14 აპრილს პუტინმა აცნობა, რომ კორონავირუსის საწინააღმდეგო ვაქცინით მეორე აცრა ჩაუტარეს. პუტინმა მოგვიანებით, ივნისში აღიარა რომ აცრა რუსული პრეპარატით Sputnik V-ით ჩაუტარეს.