მეპურეები პურის გაძვირებას მაისიდან პროგნოზირებდნენ, მაგრამ ფასმა სადღესასწაულო დღეებშივე 10 თეთრით მოიმატა და სავარაუდოდ ამდენივეთი გაძვირდება მაისში. სულ ცოტა ხნის წინ ,,პურის მწარმოებელთა ასოციაცია“ იტყობინებოდა, რომ ფასი მომდევნო თვიდან 20 თეთრით გაიზრდება.
,,თემქის პურის“ დირექტორი დალი კუპატაძე საფასო ცვლილების მიზეზად ფქვილის გაძვირებას მიიჩნევს და არ გამორიცხავს, რომ ფასმა მომავალშიც მოიმატოს, თუკი რუსული ხორბალი ჩანაცვლდება სხვა ქვეყნებიდან ან გაძვირდება რუსული ფქვილი, რომელსაც ამ ეტაპზე საცხობების უმეტესობა მოიხმარს.
,,აღდგომის წინა დღეებში პურზე ფასმა ნამდვილად მოიმატა. ჯერ კიდევ რუსეთის ბაზარზე ვართ დამოკიდებული. არ არის ის სიტუაცია, რომ სტაბილურად იგრძნო თავი ან რამე პროგნოზი გააკეთო. 1 ტომარა ფქვილს 75 ლარად ვყიდულობთ. არ გამოვრიცხავთ, რუსეთმა მოულოდნელად უარი თქვას ფქვილის ექსპორტზეც ან შეზღუდოს, როგორც ეს ხორბლისა და ზეთის შემთხვევაში გააკეთა. სხვა მომწოდებელი გამოჩნდება, მაგრამ შესყიდვა სხვა ფასში მოგვიწევს. უკრაინაში ომია და სავაჭრო-ეკონომიკური კავშირები შეცვლილია, საბოლოოდ მაინც ფქვილის ფასია გადამწყვეტი, გაძვირების ტენდენცია თუ გაგრძელდება, პურის ფასიც თავისთავად მოიმატებს“, – ამბობს ,,კომერსანტთან“ დალი კუპატაძე.
რაც შეეხება წისქვილკომბინატებს, მათი დიდი ნაწილი დაიხურა, რადგან ქვეყანა ფქვილს უფრო მეტად ყიდულობს, თუმცა, საბოლოოდ აღმოჩნდა, რომ ვერც ფქვილის იმპორტის გაზრდით მოხერხდა პურზე ფასის შენარჩუნება.
სულ ცოტა ხნის წინ გაძვირდა თონის პურიც და 1,30 ლარი შეადგინა.
ინფორმაციისთვის, რუსეთის მიერ ხორბალზე საბაჟო გადასახადის დაწესების შემდეგ, ფქვილის იმპორტი მზარდია. საქართველოში მიმდინარე წლის პირველ ორ თვეში 23 057 ტონა ფქვილი შემოვიდა. მაშინ, როცა გასული წლის ანალოგიურ პერიოდში, მხოლოდ 2 321 ტონა ფქვილის იმპორტი განხორციელდა.
საქართველოს გარემოს დაცვისა და სოფლის მეურნეობის სამინისტროს განცხადებით, ხორბლის და ფქვილის მარაგები ქვეყანას საკმარისი აქვს და ამ მიმართულებით საფრთხე არ ემუქრება.
commersant.ge
Loading ...