პრემიერის განცხადებით, მთისპირის “იდუმალ ტბაზე” ტურისტული ინფრასტრუქტურა განვითარდება

მომავალი წლიდან 10 საკურორტო ქალაქის და დაბის რეაბილიტაცია, ასევე ახალ ტურისტულ მარშრუტებზე ინფრასტრუქტურის მოწყობა იგეგმება-ამის შესახებ საქართველოს პრემიერ-მინისტრმა, ირაკლი ღარიბაშვილმა 2022 წლის ანგარიშის წარდგენისას განაცხადა.

პრემიერის ანგარიშში მოხვდა ოზურგეთის მუნიციპალიტეტის სოფელ მთისპირში მდებარე ”იდუმალი ტბაც”, სადაც ირაკლი ღარიბაშვილის განცხადებით, ბიზნესისთვის საინტერესო შეთავაზებები გაკეთდება.

“ჩვენ 2023 წელს ვიწყებთ მინიმუმ 10 ახალი საკურორტო ქალაქისა და დაბის სრულ რეაბილიტაციას. ეს იქნება სრული განახლება. რაც ვფიქრობ, ძალიან საინტერესო იქნება ჩვენი ტურისტებისთვის და ჩვენი მოქალაქეებისთვის. ჩვენ შევარჩიეთ ყველაზე პოპულარული საკურორტო ადგილები. სწორედ ამ მიმართულებით შეირჩა 10 ახალი საკურორტო ქალაქი, რომლის პრეზენტაცია იქნება რამდენიმე კვირაში. ჩვენ ამას დეტალურად წარმოგიდგენთ. ჩვენ ასევე შევისწავლეთ 100-ზე მეტი კლიმატური და ბალნეოლოგიური კურორტი, საკურორტო ადგილის მდგომარეობა და განვითარების პოტენციალი, რომელიც გვინდა, რომ შევთავაზოთ ჩვენ ადგილობრივ ბიზნესს, ინვესტორებს. 300-მდე კურორტის შესწავლა დამთავრდება 2023 წელს. მოკლე ვადებში, კურორტებსა და საკურორტო ადგილებზე ბიზნესისთვის საინტერესო და მიმზიდველი საინვესტიციო პროექტები იქნება წარმოდგენილი. რომელიც გულისხმობს პილიგრიმების ბილიკის განვითარებას – „წმინდა ნინოს გზა“, რომელიც 540 კილომეტრს შეადგენს და რომელიც მოიცავს ფოკა-ბოდბის მარშრუტს. მსგავსი ქრისტიანული პილიგრიმების მარშრუტები მსოფლიოში ძალიან ცნობილი და დიდი პოპულარობით სარგებლობს და გვინდა, რომ აღნიშნული პროექტიც განვახორციელოთ. ასევე ვამუშავებთ რამდენიმე კონკრეტული ლოკაციების განვითარებას. მოგეხსენებათ, ჩვენი ქვეყანა მდიდარია ტბებით, წყალსაცავებით, შეირჩა კონკრეტული ლოკაციები, ეს არის თრიალას ტბები, ნადარბაზევის ტბა, იდუმალი ტბა, ლაკბეს წყალსაცავი, ფარავნის ტბა და ამ მიმართულებით საინტერესო შეთავაზებები გვექნება ბიზნესისთვის.”– განაცხადა ირაკლი ღარიბაშვილმა.