პრაქტიკოსი მასწავლებლის სტატუსი 3457 პედაგოგს გაუუქმდა. „ინტერპრესნიუსის“ მიერ მასწავლებელთა პროფესიული განვითარების ეროვნული ცენტრიდან გამოთხოვილი საჯარო ინფორმაციის თანახმად, ზოგადსაგანმანათლებლო დაწესებულებებმა მასწავლებელთა კონკურსი მიმდინარე, 2021-2022 სასწავლო წლის პირველი სემესტრის დასრულებამდე ერთი თვით ადრე უნდა გამოაცხადონ.
ვაკანტური პოზიციის შეუვსებლობის შემთხვევაში კი, ზოგადსაგანმანათლებლო დაწესებულებები საჭიროებიდან გამომდინარე, უფლებამოსილნი არიან, პედაგოგები, რომელთაც უფროსი მასწავლებლის სტატუსი ვერ მოიპოვეს და შესაბამისად, პრაქტიკოსი მასწავლებლის სტატუსი შეუწყდათ, მოცემულ პოზიციაზე ვაკანსიის შევსებამდე უსტატუსოდ დაასაქმონ.
პრაქტიკოს მასწავლებლებს სტატუსის ამაღლების შესაძლებლობა 2015 წლიდან დღემდე არაერთხელ ჰქონდათ. მათთვის განსაზღვრული ბოლო საგნობრივი და პროფესიული უნარების გამოცდა კი, პანდემიური ვითარებიდან გამომდინარე, 2020 წლის შემოდგომის ნაცვლად 2021 წლის ზაფხულში ჩატარდა.
მასწავლებლის პროფესიული განვითარების ეროვნული ცენტრის განმარტებით, 2021 წლის გამოცდების და ტრენინგების შედეგების გათვალისწინებით, კანონმდებლობის შესაბამისად, მასწავლებლების პროფესიული განვითარების ეროვნულმა ცენტრმა, იმ მასწავლებლების სია, რომლებმაც ვერ დააგროვეს სტატუსის ასამაღლებლად საჭირო 19 კრედიტქულა, გადასცა განათლების მართვის საინფორმაციო სისტემას, რომელმაც მიწოდებული ინფორმაციის საფუძველზე (კანონმდებლობის შესაბამისად) ზემოაღნიშნულ პედაგოგებს პრაქტიკოსი მასწავლებლის სტატუსი გაუუქმა.
ცნობისთვის, წელს მასწავლებლის საგნობრივი კომპეტენციის დამადასტურებელ გამოცდაზე გასული 5340 მოქმედი პრაქტიკოსი მასწავლებლიდან 2886-მა მინიმალური ზღვარი ვერ გადალახა, პროფესიული უნარების გამოცდა კი 4137 პრაქტიკოსი პედაგოგიდან 2365-მა ვერ ჩააბარა.
www.interpressnews.ge
Loading ...
