პოლონეთში ქართველების დასაქმება გართულდა – „ ადამიანებს სამუშაო ნებართვის მისაღებად თვეობით ლოდინი უწევთ“

პოლონეთში დასაქმების მაძიებელი საქართველოს მოქალაქეებისთვის სავიზო პროცედურები გამკაცრდა. ეს მას შემდეგ, რაც 2025 წლის 1 დეკემბრიდან პოლონეთმა საქართველოს მოქალაქეებისთვის გამარტივებული წესით სამუშაო ვიზის გაცემის მექანიზმი გააუქმა.

რეკრუტერები ამბობენ, რომ მათ, ვისაც კონტრაქტი წლის ბოლოს ამოეწურათ, იძულებულნი გახდნენ საქართველოში დაბრუნებულიყვნენ. მათი თქმით, თუ აქამდე შესაბამისი ორგანო ერთ კვირაში იღებდა გადაწყვეტილებას სამუშაო ნებართვის გაცემასთან დაკავშირებით, ახლა სამუშაოს მაძიებლებს თვეობით უწევთ ლოდინი. გარდა იმისა, რომ პროცედურები დროში გახანგრძლივდა, გაიზარდა სამუშაო ნებართვის მოსაკრებელიც.

„ის ვადები, რაც იყო თავიდან ნათქვამი, რომ სამუშაო ნებართვას კანდიდატი მიიღებდა დაახლოებით სამი თვის ვადაში, ამან გადაიწია ხუთ-ექვს თვემდე. ვერაფრით ვერ მიიღეს ჩემმა კანდიდატებმა დეკემბრის მერე საბუთი და ჯერჯერობით ვერცერთი კანდიდატი საკონსულოში ვერ შევიყვანე. შესაბამისად, რამდენად გასცემენ სამუშაო ვიზებს, ამაზე სამწუხაროდ მე ინფორმაციას არ ვფლობ, ზუსტად აი ამ მიზეზების გამო, რომ პროცესები დროში ძალიან იწელება.

ძალიან დიდი მოთხოვნაა კოლუმბიის მოქალაქეებზე პოლონეთში. კოლუმბიის მოქალაქესაც სჭირდება იმავენაირი ნებართვა, როგორც გვჭირდება ჩვენ, მაგრამ თუკი კოლუმბიელს დღეს აქვს უფლება შემოვიდეს ბიომეტრიული პასპორტით, სამუშაო პროცესში დაელოდოს ნებართვას და მერე უპრობლემოდ მოახდინოს ლეგალიზაცია პოლონეთის ტერიტორიაზე, ჩვენს საემიგრაციო სამსახურში გვცემენ საქართველოს მოქალაქეებზე ასეთ პასუხს, რომ ბიომეტრიულით თუკი შევა კანდიდატი პოლონეთში, ის ვერ მოახერხებს ლეგალიზაციას. ანუ უნდა იმუშაოს რაღაც პერიოდი და უკან დაბრუნდეს.

დეკემბრის მერე ძალიან ბევრი ქართველი დაბრუნდა საქართველოში. პირველ დეკემბერს მიიღეს ეს კანონი, წლის ბოლოს როგორც წესი უმრავლესობას უმთავრდებოდა სამუშაო კონტრაქტები. კონტრაქტები არ გაუგრძელეს ზუსტად ამ კანონიდან გამომდინარე. ადამიანები დარჩნენ ჩიხში, ვერ ხვდებოდნენ რა უნდა გაეკეთებინათ და დაბრუნდნენ საქართველოში. მარტო ჩემი კანდიდატი სადღაც 50 კაცამდე დაბრუნდა საქართველოში.

ასევე, თუ გამარტივებული დასაქმების პერიოდში სამუშაო ნებართვა ღირდა 100 ზლოტი, ახლა გახდა 400 ზლოტი“,- აცხადებს BM.GE-სთან ირინა ნამიჩეიშვილი, HR რეკრუტერი

ევროკავშირის ქვეყნებიდან პოლონეთი საქართველოს მოქალაქეების დასაქმების ძირითად ბაზარს წარმოადგენს. მხოლოდ 2024 წელს პოლონეთში საქართველოს მოქალაქეებზე 76 671 სამუშაო ნებართვა იყო გაცემული. აღნიშნულ პერიოდში 6 560 დამსაქმებელი/ორგანიზაცია აღირიცხა, რომლებმაც 47 ათასზე მეტი საქართველოს მოქალაქე დაასაქმეს.საქართველოს ევროკავშირთან დაშორების კვალდაკვალ პოლონეთის მთავრობის მიერ მიღებული გადაწყვეტილების გამო დასაქმების აგენტების ინფორმაციით, სამშობლოში დაბრუნება ასეულობით საქართველოს მოქალაქეს მოუწია.

www.bm.ge