კომპანია „ცენტრ-პოინტის“ ერთ-ერთი დამფუძნებლის, გუკა რჩეულიშვილის დაკავების შესახებ რადიო თავისუფლებისთვის ცნობილი გახდა. შინაგან საქმეთა სამინისტრო ფაქტს ჯერჯერობით არ ადასტურებს.
გუკა რჩეულიშვილზე ძებნა პროკურატურამ დღეს, 12 მარტს, მას შემდეგ გამოაცხადა, რაც თბილისის საქალაქო სასამართლომ გუკა რჩეულიშვილის მეუღლის ლელა კილაძის მიმართ შემაკავებელი ორდერით გათვალისწინებული ვალდებულების დარღვევის ფაქტზე აღკვეთის ღონისძიების სახით პატიმრობა დაუსწრებლად შეუფარდა. ვინაიდან გუკა რჩეულიშვილი არ გამოცხადდა სასამართლო პროცესზე და პროკურატურის შეფასებით, თავს არიდებს გამოძიებას, მასზე რამდენიმე საათში ძებნა გამოცხადდა.
რაც შეეხება საქმის გარემოებებს, გამოძიების ცნობით, გუკა რჩეულიშვილს 2020 წლის 25 თებერვალს გამოცემული შემაკავებელი ორდერით 30 დღით აეკრძალა მეუღლესთან რაიმე ფორმით, მათ შორის სატელეფონო ან სხვა რაიმე ტექნიკური საშუალების გამოყენებით კომუნიკაცია. მიუხედავად ამისა, როგორც პროკურატურაა აცხადებს, 2020 წლის 8 მარტს ღამის საათებში ლელა კილაძეს ადგილსამყოფელის დადგენისა და შეხვედრის ორგანიზების მიზნით, მოკლეტექსტური და ხმოვანი შეტყობინებები გაუგზავნა, რითაც დაარღვია შემაკავებელი ორდერით გათვალისწინებული მოთხოვნები.
რჩეულიშვილს კიდევ ერთი ეპიზოდი უკავშირდება. როგორც პროკურატურა აღნიშნავს, შემაკავებელი ორდერის დარღვევის ფაქტთან დაკავშირებით დაბარებულმა გუკა რჩეულიშვილმა 11 მარტს პოლიციის განყოფილებაში მოთეთრო ფერის ქაღალდში შეხვეული, ასევე თეთრი ფერის ფხვიერი მასა წარადგინა, რომელიც მისი განმარტებით იყო ნარკოტიკული საშუალება „კოკაინი“ და რომლის ნაწილიც მან მოიხმარა. აღნიშნულ ფაქტთან დაკავშირებით გამოძიება ნარკოტიკული საშუალების უკანონო შეძენა-შენახვის მუხლით (260-ე მუხლის პირველი ნაწილით) დაიწყო.
გამოძიების ინფორმაციით, სამართალდამცველებმა რჩეულიშვილისგან წარმოდგენილი ზემოაღნიშნული ნივთიერება ამოიღეს, ხოლო მისი პირადი ჩხრეკის შედეგად ამოღებული იქნა ერთჯერადი მოხმარების ე.წ. „ინსულინის“ შპრიცი მასში არსებული მოთეთრო ლაქით. ამოღებულ ნივთებზე დაინიშნა ქიმიური ექსპერტიზა.
გ.რ.-ს ნარკოლოგიური კვლევის შედეგად ნარკოტიკული საშუალებების – „კოკაინის“, „ტეტრაჰიდროკანაბინიოლისა“ და „ტრამადოლის“ მოხმარების ფაქტი დაუდგინდა. სისხლის სამართლის საქმეზე გამოძიება მიმდინარეობს.
Loading ...