პირს, რომელმაც საპასუხო სროლით ადამიანი მოკლა, პატიმრობა შეეფარდა

პროკურატურის ცნობით, ახმეტის მუნიციპალიტეტში მომხდარი განზრახ მკვლელობის ფაქტზე პირს პატიმრობა შეეფარდა.

“შინაგან საქმეთა სამინისტროს მიერ ჩატარებული გამოძიებით დადგინდა, რომ 11 მაისს, ახმეტის მუნიციპალიტეტის სოფელ ქისტაურში, ბრალდებულმა ცეცხლსასროლი იარაღიდან დაზარალებულს ჭრილობა მიაყენა. მიღებული დაზიანების შედეგად დაზარალებული ადგილზე გარდაიცვალა.

ბრალდებულს ბრალდება საქათველოს სისხლის სამართლის კოდექსის 108-ე მუხლით (განზრახ მკვლელობა) და 236-ე მუხლის მე-4 ნაწილით (ცეცხლსასროლი იარაღის მართლსაწინააღმდეგო ტარება) წარედგინა, რაც სასჯელის სახედ და ზომად 15 წლამდე თავისუფლების აღკვეთას ითვალისწინებს” – წერია პროკურატურის განცხადებაში.

შსს-ს 12 მაისს გავრცელებული განცხადების მიხედვით, ახმეტაში 40-წლამდე კაცი თანასოფლელმა ცეცხლსასროლი იარაღით მოკლა. შემთხვევა გვიან ღამით მოხდა. დაიჭრა ბრალდებულიც, რომელიც კლინიკაში გადაიყვანეს.

“გამოძიებით დადგინდა, რომ მიმდინარე წლის 11 მაისს, ახმეტის მუნიციპალიტეტში, ურთიერთშელაპარაკების ნიადაგზე ჯ.კ.-მ სანადირო თოფიდან გასროლით ფეხის არეში დაჭრა რ.ლ., რის შემდგომაც ბრალდებულმა რ.ლ.-მ ცეცხლსასროლი იარაღით სასიკვდილო დაზიანება მიაყენა ჯ.კ.-ს.

ბრალდებული რ.ლ. კლინიკაშია გადაყვანილი, სადაც შესაბამისი მკურნალობა უტარდება, ხოლო ჯ.კ. შემთხვევის ადგილზე გარდაიცვალა” – ეწერა შსს-ს განცხადებაში.