მედიაში გავრცელებული ინფორმაციით, 18 სექტემბერს ლიბანში ჰეზბოლას მიერ გამოყენებული პორტატიული რაციებიც აფეთქდა მას შემდეგ, რაც გუშინ ტერორისტული დაჯგუფების ასობით წევრის პეიჯერი ერთდროულად აფეთქდა და დაჯგუფების, სულ მცირე, 8 წევრი იმსხვერპლა.
რაციების აფეთქების შესახებ ინფორმაციას უსაფრთხოების წყაროები და თვითმხილველები ავრცელებენ.
ლიბანის სამთავრობო მედიის ცნობით, ბოლო აფეთქებებს ლიბანის ერთ-ერთ რეგიონში სამი ადამიანი ამსხვერპლა. მათ შორის ერთი აფეთქება გუშინ პეიჯერების აფეთქების დროს დაღუპული პირის დაკრძალვის მიმდებარედ მოხდა.
გამოცემა Reuters-ის უსაფრთხოების წყაროს თქმით, რაციები ჰეზბოლამ ხუთი თვის წინ შეისყიდა, დაახლოებით იმ დროს, როდესაც ორგანიზაციამ პეიჯერები იყიდა.
17 სექტემბერს ლიბანში ერთდროულად ასობით პეიჯერი აფეთქდა, რომლებსაც ჰეზბოლას ტერორისტული ორგანიზაციის წევრები ატარებდნენ. თვითმხილველების თქმით, მათ შარვლების ჯიბეებიდან კვამლი დაინახეს, რასაც მალევე აფეთქება მოჰყვა.
მაღალჩინოსნების ცნობით, აფეთქებები მაღაზიებში, სახლებსა და მანქანებში ერთდროულად მოხდა, რის შედეგადაც, სულ მცირე, 9 ადამიანი დაიღუპა, ხოლო არანაკლებ 2 700 დაიჭრა. ჰეზბოლამ ასევე განაცხადა, რომ ინციდენტის დროს მათი, სულ მცირე, რვა მებრძოლი დაიღუპა
ამერიკელი და სხვა მაღალჩინოსნების მიხედვით, ისრაელმა ლიბანში იმპორტირებული ტაივანში დამზადებული პეიჯერების პარტიაში ფეთქებადი ნივთიერება დამალა.
ორი მაღალჩინოსნის თქმით, ფეთქებადი ნივთიერება, რომლის რაოდენობაც 30-50 გრამს არ აღემატებოდა, თითოეული პეიჯერის ბატარეის გვერდით დამალეს. შესაბამისად, პეიჯერები, რომლებიც ჰეზბოლამ ტაივანური კომპანია Gold Apollo-სგან გამოიწერა, ლიბანში ჩაღწევამდე უკვე აფეთქებისთვის იყო გამზადებული.
ისრაელის არმიამ მომხდართან დაკავშირებით კომენტარის გაკეთებაზე უარი განაცხადა, ხოლო პრემიერმინისტრი ბენიამინ ნეთანიაჰუს უწყებაში კომენტარის გაკეთების შესახებ მოთხოვნისთვის არ უპასუხიათ.
Loading ...