ოქროს ფასმა მორიგი რეკორდი მოხსნა – რატომ ძვირდება ძვირფასი ლითონი

გლობალურ ბაზრებზე ოქროს ფასმა ახალი რეკორდი დაამყარა. თბილისის დროით 12:00 საათის მდგომარეობით, 1 უნციას ფასი 3 714 დოლარით განისაზღვრება.

აღსანიშნავია, რომ მხოლოდ ერთი დღის ჭრილში ოქროზე ფასი 0.78%-ით გაიზარდა, თვის ჭრილში ფიქსირდება 9.3%-იანი მატება, წლიურად კი ძვირფასი ლითონი 40%-იან გაძვირებას აჩვენებს.

Trading Economics-ის ინფორმაციით, ოქროს გაძვირებას ხელი შეუწყო აშშ-ის ფედერალური რეზერვის მიერ რეფინანსირების განაკვეთის შემცირების შესახებ გადაწყვეტილებამ და მოლოდინმა, რომ წლის ბოლომდე განაკვეთი კიდევ უფრო შემცირდება.

გამოცემა წერს, რომ ინვესტორები მიმდინარე კვირას აშშ-ის ინფლაციის ძირითად მონაცემებსა და სამომავლო პოლიტიკის შესახებ ფედერალური რეზერვის წარმომადგენლების განცხადებებს ელიან, რაც ოქროზე მოთხოვნასა და ფასების ზრდას იწვევს.

ამასთანავე, ძვირფასი ლითონის გაძვირებისთვის კიდევ ერთი ხელშემწყობი ფაქტორია გეოპოლიტიკური დაძაბულობა და ტარიფებთან დაკავშირებით ამერიკის პრეზიდენტის დონალდ ტრამპის გადაწყვეტილებები, რის ფონზეც ინვესტორები დასაბანდებლად ოქროს სახით უსაფრთხო გზებს ეძებენ.