ოკუპირებულ აფხაზეთში უპილოტო საფრენი აპარატი ჩამოვარდა

რადიო თავისუფლების პროექტი Эхо Кавказа-ს ცნობით, ოკუპირებულ აფხაზეთში უპილოტო საფრენი აპარატი ჩამოვარდა.

“ოკუპირებული აფხაზეთის ოჩამჩირის რაიონის ერთ-ერთ სოფელში უპილოტო საფრენი აპარატის ნამსხვრევები იპოვეს. ვარდნამ ელექტროგადამცემი ხაზი დააზიანა” – წერს Эхо Кавказа.

თავის მხრივ, გამოცემა რუსულ პროპაგანდისტულ სააგენტო TASS-ის მონაცემებს ეყრდნობა. როგორც Эхо Кавказа წერს, ადგილზე მობილიზებულია სარემონტო ბრიგადა და სოფელში ელექტროენერგიის აღდგენა მიმდინარეობს.

გამოცემის ინფორმაციით, მარიონეტული რეჟიმის ე.წ. საგანგებო სიტუაციების მართვის სამსახურში ამბობენ, რომ ცნობები დრონების შესაძლო ჩამოვარდნის შესახებ გაგრის, ახალი ათონისა და გულრიფშის რაიონებიდანაც მიიღეს. ადგილზე გასულმა მაშველებმა ნამსხვრევები ვერ იპოვეს და ეს ინფორმაცია ამ დრომდე დაუდასტურებელია.

ოკუპირებული აფხაზეთის მარიონეტული ე.წ. თავდაცვის უწყების განმარტებით, საჰაერო თავდაცვისა და რადიოელექტრონული ბრძოლის საშუალებები “საჰაერო სივრცის დარღვევის აღკვეთას” ცდილობენ. საოკუპაციო რეჟიმი მოსახლეობას აფრთხილებს, რომ ნამსხვრევების ნახვის შემთხვევაში მათ არ მიუახლოვდნენ.

მანამდე, 4 მარტს, “დრონების საფრთხის” მიზეზით მუშაობა დროებით შეწყვიტა “ფსოუს” გამშვებმა პუნქტმა. სოციალურ ქსელებში ასევე გავრცელდა ვიდეოკადრები, სადაც ოკუპირებული რეგიონის ცაზე მფრინავი დრონები ჩანს.