ოზურგეთში სასაფლაოზე შესული სასულიერო პირები პოლიციამ უკან გამოუშვა. ინფორმაციას ამის შესახებ “ტვ პირველი” ავრცელებს. შემთხვევა მოიდანახეს სასაფლაოზე მოხდა, სადაც მამა ერმოლაოსი და მამა ლონგინოზი მიცვალებულთათვის პანაშვიდის გადასახდელად იყვნენ მისულები. სასულიერო პირებმა სასაფლაოზე მისვლა საპატრიარქოს განცხადების საფუძველზე გადაწყვიტეს, რომლის თანახმადაც მღვდლებს საფლავების კურთხევის საშუალება მიეცემოდათ. თუმცა ადგილზე მისულ მღვდლებს სამართალდამცავებმა დაწყებული რიტუალი შეაწყვეტინეს და სასაფლაო დაატოვებინეს. “ გასაგებია, რომ პანდემიაა და სხვადასხვა შეზღუდვა მოქმედებს. თუმცა არა მგონია, მხოლოდ მღვდლის შესვლამ საფლავებზე პანდემიის გართულებას შეუწყოს ხელი. შარშანაც იგივე სიტუაცია იყო, მაგრამ სასაფლაოსთან განლაგებულმა სამართალდამცველებმა შეგვიშვეს და კურთხევის ჩატარების საშუალებაც მოგვცეს. თუმცა წელს რახან გვიკრძალეს, ცხადია, დავემორჩილეთ”- განაცხადა მამა ერმოლაოსმა.