ელექტრონულ პეტიციას, რომლის მიხედვითაც ავტორი ზურაბ თავბერიძე ოზურგეთში საზოგადო მოღვაწეთა პანთეონის გახსნას ითხოვს, საკმაოდ ბევრი მხარდამჭერი გამოუჩნდა. პეტიციას, რომელიც ოზურგეთის მუნიციპალიტეტის ვებ–გვერდზეა დარეგისტრირებული, კანონით გათვალისწინებულ მინიმუმზე (315 ხელმოწერა) 100 ადამიანით მეტმა, 415 მოქალაქემ მოაწერა ხელი.
ელექტრონულ პეტიციაზე ხელმოწერის ვადა დღეს, 19 დეკემბერს მთავრდება. ამის შემდეგ ოზურგეთის მუნიციპალიტეტის საკრებულოს აპარატს სამი დღე აქვს ხელმოწერების ნამდვილობის დასადგენად და იმის შესასწავლად, არის თუ არა მათგან მინიმუმ 315 მოქალაქე ოზურგეთის მუნიციპალიტეტში რეგისტრირებული.
აღნიშნული პროცედურის შემდეგ ოზურგეთში საზოგადო მოღვაწეთა პანთეონის დაარსების საკითხი ოზურგეთის საკრებულოს ბიუროს სხდომაზე გავა, საიდანაც შესასწავლად ის დარგობრივ კომისიას ან ოზურგეთის მუნიციპალიტეტის მერიას, შესაძლოა ორივეს ერთად გადაეცეს.
შეგახსნებთ, რომ პეტიციის ავტორი ზურაბ თავბერიძე ოზურგეთის მუნიციპალიტეტს პანთეონის მოსაწყობად საჭირო მიწის ნაკვეთის და შესაბამისი ფინანსების გამოყოფას სთხოვს. პეტიცია შეგიძლიათ იხილოთ აქ.
Loading ...